माघ ५ , काठमाडौं । नेपालमा कोरोना भाईरस कोभिड-१९ को नयाँ प्रकार भित्रिएको पुष्टि भएको छ । नेपालमा पहिलेकै पुरानो कोरोना संक्रमणको निर्मुल नहुँदै फेरी नयाँ प्रकारको कोरोना भित्रिएपछि चिन्ताको विषय बनेको छ ।
पुस पहिलो साता बेलायतबाट आएका तीन जनामा देखिएको संक्रमण नयाँ प्रकारको भएको पाइएको स्वास्थ्य तथा जनासंख्या मन्त्रालयले जानकारी दिएको छ । पुस पहिलो साता बेलायतबाट आएका ६ जनामा कोरोना संक्रमण भएको १३ पुसमा पुष्टि भएको थियो । तर जिन सिक्वेन्सिङ नभएका कारण नयाँ प्रकार भएरनभएको खुलेको थिएन ।
स्वास्थ्य तथा जनसंख्या मन्त्रालयका अनुसार २७ पुसमा उनीहरुको नमुना हङकङ प्रयोगशालामा पठाइएको थियो । त्यसमध्ये ३ जनामा देखिएको भाइरस नयाँ प्रकारको भएको पुष्टि भएको छ ।
२८ वर्षीया महिला, ३२ र ६७ वर्षीय पुरुषमा नयाँ प्रकारको भाइरस देखिएको हो । उनीहरुमध्ये २८ वर्षीया महिला र ३२ वर्षीय पुरुष नेगेटिभ भइसकेका छन् भने ६७ वर्षीय पुरुष पोजेटिभ नै छन् । तर उनमा लक्षण नभएको स्वास्थ्य मन्त्रालयका प्रवक्ता डा । जागेश्वर गौतमले जानकारी दिएका छन् ।
