समाचार

अरु दिन भन्दा आज देशभर कम पानी पर्ने मौसमविदको भनाई

९ साउन, काठमाडौं । देशका विभिन्न ठाउँमा आज र भोलि हिजो अस्तिको भन्दा कम पानी पर्ने मौसमविद्ले बताएका छन् । तर पर्सिदेखि भने फेरि पानी पर्ने क्रम बढ्दै जाने संभावना रहेको मौसम पूर्वानुमान महाशाखाका मौसमविद् मिनकुमार अर्यालले जानकारी दिएका छन् ।

उनकाअनुसार मनसुनी न्यूनचापीय रेखा नेपालको पश्चिममा केही पर र पूर्वमा नजिक रहेकाले आज पश्चिमको तुलनामा पूर्वमा अलि धेरै पानी पर्नेछ ।

तर आज र भोलि हिजोअस्तिको भन्दा कम पानी पर्ने उहाँको अनुमान छ । आज देशभरीकै मौसम सामान्य बदली भएर केही ठाउँमा हल्कादेखि मध्यम खालको पानी पर्ने र प्रदेश १, २, ५, वाग्मती प्रदेश र गण्डकी प्रदेशका एकदुई ठाउँमा ठूलो पानी पर्ने सम्भावना रहेको उहाँले जानकारी दिएका छन् ।

यसैगरी राति देशभरीकै मौसम सामान्य बदली भएर केही ठाउँमा हल्कादेखि मध्यम खालको र प्रदेश १, ५, गण्डकी प्रदेश र सुदूरपश्चिम प्रदेशका एक दुई ठाउँमा ठूलो पानी पर्ने सम्भावना रहेको मौसमविद् अर्यालको भनाइ छ ।

पानी पर्ने भएकाले साना ठूला नदीमा एक्कासी बाढी आउन सक्ने भन्दै नदी किनारमा नजान तथा लगातार पानी पर्दा जमिन गलेकाले पहिरोको जोखिम रहेकाले हिँडडुल गर्दा ख्याल गर्न उनले आग्रह गरेका छन् । अहिले नारायणी नदीमा पानीको सतहले चेतावनी तह पार गरेकाले आसपासका बासिन्दालाई सतर्क हुन बाढी पूर्वानुमान महाशाखाले अनुरोध छ ।