आर्थिक

नुवाकोटका स्थानीय तहको ६ अर्बको बजेट

११ असार, नुवाकोट । जिल्लामा सबै स्थानीय तहले गाउँ/नगरसभा सम्पन्न गरेका छन् । स्थानीय तहमा बुधबार आयोजित सभामा १२ वटै स्थानीय तहले नीति तथा कार्यक्रम र बजेट पेश गरेका छन् ।
जिल्लाका सबै स्थानीय तहमा गरी ६ अर्ब सात करोड ९० लाखको बजेट प्रस्तुत भएको छ । सबैभन्दा बढी विदुर नगरपालिकाको एक अर्ब आठ करोड बजेट पेश भएको छ ।

त्यस्तै बेलकोटगढी नगरपालिकाको ९९ करोड ९३ लाखको बजेट पेश भएको छ । गाउँपालिका शिवपुरीले ४९ करोड २५ लाख, ककनीले ४३ करोड, दुप्चेश्वरले ४१ करोड, पञ्चकन्याले ४० करोड ९३ लाख, किस्पाङले ४० करोड दुई लाख, तारकेश्वरले ३९ करोड ६८ लाख, सूर्यगढीले ३८ करोड १२ लाख, लिखुले ३७ करोड ७८ लाख र तादीले ३६ करोड १९ लाखको बजेट तथा कार्यक्रम सभामा पेश गरेका छन् ।
जिल्लामा सबैभन्दा कम म्यागङ गाउँपालिकाको बजेट ३४ करोड गाउँसभामा पेश भएको छ । पेश भएको नीति तथा कार्यक्रम र बजेट केही स्थानीय तहले पारित गरिसकेका छन् भने केहीले छलफलपछि पारित गरिने जनाएका छन् ।
सभामा पेश भएको नीति तथा कार्यक्रम र बजेटमा सबै पालिकाले कोरोनाविरुद्ध प्राथमिकता दिएर कार्यक्रम राखेका छन् । कृषि क्षेत्र, सडकलगायत पूर्वाधार विकासमा बजेट धेरै विनियोजन गरेको पाइएको छ ।