६ असार, चिप्लेढुङ्गा । कोरोना महामारीमा भएको बन्दाबन्दीले समस्यामा परेका भाडावाला व्यवसायीलाई सञ्चारकर्मी कञ्चन थापाले घरभाडामा ५० प्रतिशत छुट दिएका छन् ।
पोखरा महानगरपालिका वडा नं ५ पस्याङस्थित घरभाडामा रहेको ‘मल्टी स्टार मोटर प्रालि’को शो रुमलाई तीन महिनाको ५० प्रतिशत भाडा छुट दिइएको थापाले जानकारी दिए । “अहिलेको अवस्था सहज छैन, घरधनीका पनि आफ्नै समस्या छन् । व्यवसाय नै सञ्चालन हुन नसक्दा व्यवसायी झन् मर्कामा छन् । त्यसैले हामीले तीन महिनाको घरभाडामा छुट दिने निर्णय गरेका हौँ ”, अन्नपूर्ण एफएम र फेवा टेलिभिजनकर्मी थापाले बताए ।
थापाका श्रीमान् नरेन्द्र कोइरालाले घरभाडामा तीन महिनाको कुल एक लाख ३५ हजार छुट दिइएको र सम्झौतानुसार प्रत्येक वर्ष बढाइएको १० प्रतिशत भाडा पनि एक वर्ष नबढाइने निर्णय गरिएको जानकारी दिए ।
