पु.समाचार

क्यारेन्टाईनमा बसेका १९ बर्षिय एक पुरुषको एकाबिहानै मृत्यु

२५ जेठ, डोटी । तीन महिलासहित १० जना बसेको एक क्वारेन्टाईनमा १९ बर्षीय एक युवकको निधन भएको छ । आज बिहान ३ बजे निधन भएका उनलाई मुटु रोग भएको बताईएको छ ।

स्वास्थ्य कार्यालय डोटीका प्रमुख रमेश मलासीका अनुसार मृतकसहित क्वारेन्टाईनमा बसेको १० जनाकै स्वाब संकलन गरी कोरोना भाईरस परीक्षणका लागि पठाईएको र आज साँझसम्ममा रिपोर्ट आईसक्ने बताएका छन् ।

दाहसँस्कार रिपोर्ट अँएपछि गरिने जनाउँद्यै घटनास्थल प्रहरीले नियन्त्रणमा लिईसकेको प्रहरी निरीक्षक कर्णबहादुर बोहोराले जताएको समाचारहरुले जानकारी दिएका छन् ।

मृतक केआइसिंह गाउँपालिका–३ स्थित क्वारेन्टिनमा बसेका १९ वर्षीय  युवक हुन्। वडा नं ३ का १९ वर्षीय युवकको आज बिहान ३ बजे मृत्यु भएको हो । उनी लामो समयदेखि मुटुका बिरामी थिए । बेलाबेला मुखबाट रगत निकाल्ने, काँप्ने लक्षण देखिँदै आएको उनका बुबा गजैसिं ऐरले बताए ।

भारतको दिल्लीबाट उनी जेठ २० गते आइपुगेपछि सीताराम आधारभूत विद्यालयमा बनाइएको क्वारेन्टिनमा राखिएको थिए । ‘१२÷१३ वर्षदेखि छोरा रोगी थियो, खेत बेचेरसमेत भारतका विभिन्न अस्पतालमा उपचार गरेको थिएँ”, मृतकका बुबा ऐरले भने, “क्वारेन्टिनमा छोरालाई बिसञ्चो भएपछि भेट्न पुगेँ, म पुग्ने बित्तिकै छोरो बेहोस भई ढल्यो ।”

छोरा ढलेपछि स्याहार गर्न बुबा आफैँ क्वारेन्टिन बस्ने शर्तमा भित्र पसेका थिए । “गाउँमा सामान्य झारफुक र पानी छम्केपछि छोरा अलि होसमा आउँथ्यो”, उनले भने, “पहिले पनि यस्तै हुने हुँदा रातिको समय हामीले स्वास्थ्यकर्मी तथा जनप्रतिनिधिलाई खबर गरेनौँ तर राति झन् च्यापेपछि शरीरमै दिसापिसाब र रगत फालेपछि बिहान ३ बजे प्राण त्याग्यो ।” मृतकका बुबा पनि गए रातिबाट क्वारेन्टिनमै बसेका छन् ।