२६ बैसाख, काठमाडौं । नेपाली काँग्रेसका सभापति एवं प्रमुख प्रतिपक्षी दलका नेता शेरबहादुर देउवाले कोरोनाको विश्वव्यापी महामारीबाट नेपाल र नेपालीको रक्षा गर्न गम्भीर भएर अघि बढ्नुपर्नेमा जोड दिएका छन् । सङ्घीय संसद्, प्रतिनिधिसभाको आज शुरु भएको छैटौँ अधिवेशन प्रारम्भका अवसरमा उनले कोरोनाविरुद्ध हालसम्म भएका प्रयासको गम्भीर समीक्षा गर्दै विशेष रणनीति बनाएर त्यसलाई कार्यान्वयन गर्न गराउन संसद् चुक्न नहुने बताए ।
कोभिड–१९ का कारण संसारका विभिन्न देशमा जीवन गुमाएका नेपालीप्रति श्रद्धाञ्जलि अर्पणका साथ शोकाकूल परिवारजनमा समवेदना व्यक्त गर्नाका साथै कोरोनाका कारण जीवन गुमाएका विश्वभरिका सबैको आत्माको चिरशान्तिको कामना गरे ।
उनले कोरोनासङ्क्रमित भई उपचाररत नेपालभित्रका सबै नेपाली र विभिन्न देशमा रहेका तीन हजारभन्दा बढी नेपालीको शीघ्र स्वास्थ्यलाभको कामना गर्दै पर्याप्त स्वास्थ सामग्री अभावका बाबजुद उच्च मनोबल र उच्च मानवीय भावना साथ ‘फ्रन्ट लाइन’ मा कार्य गरिरहनुभएका सबै स्वास्थकर्मीप्रति सम्मान प्रकट गरे । उनले अहोरात्र आफ्नो जिम्मेवारी निर्वाह गरिरहेका सुरक्षाकर्मी, सञ्चारकर्मी एवं सफाइका क्षेत्रमा निरन्तर काम गरिरहेका सबैको प्रशंसा गरे । कोरोनाका कारण उत्पन्न जटिल परिस्थितिमा धैर्यपूर्वक त्यसको सामना गरिरहनुभएका स्वदेश र विदेशका समस्त नेपाली दिदीबहिनी दाजुभाइको पनि प्रशंसा गर्दै उनले संयम र एकताका साथ महामारीको सामना गर्न संसद्मार्फत अपिल गरे ।
प्रतिपक्षको सहयोग र खबरदारी
कोरोनाको यो सङ्कटका बेला ‘सरकारमा सँगै नरहेर पनि सङ्कटमा सँगै लड्न सकिन्छ’ भन्ने राष्ट्रिय एकताको भावनाले प्रतिपक्षी दल नेपाली काँग्रेसले कार्य गरिरहेको, आफ्नो पार्टीका सबै तहका नेता तथा पार्टी सदस्यलाई कोभिड –१९ को नियन्त्रण र निर्मूल गर्न आआफ्नोतर्फबाट निरन्तर कार्य गर्न आह्वान गरेको जानकारी दिँदै विपक्षी दलका नेता देउवाले कोरोनाबाट नेपाल र नेपालीको रक्षा गर्न सरकारलाई हरसम्भव सघाउने तर बेथितिविरुद्ध निरन्तर लड्ने प्रतिबद्धता व्यक्त गरे ।
उनले ‘लकडाउन’ का कारण श्रमिक, बेरोजगार र विद्यार्थी समस्यामा परेका बताउँदै कोरानाले रोजगारी गुमेका र राज्यबाट सहजरुपमा राहत पाउनुपर्नेलाई सघाउन आग्रह गरे । श्रमिक, बेरोजगार, कृषक, डेरामा बस्ने विद्यार्थी, पत्रकार, मिडिया हाउस, पर्यटन व्यवसायीसहित प्रभावित सबैलाई बृहत् सहायताको व्यवस्था गर्न उनले माग गरे ।
सुकुम्बासी आयोग गठन, स्वास्थ्य सामग्री अभाव र त्यसको खरीदमा अनियमितता भएको भन्नेबारे सरकारको ध्यानाकर्षण गराउँदै उनले अनियमितता आरोप लागेकालाई पदमुक्त गरेर अनुसन्धानमा सघाउन र कडा कारवाही गर्न माग पनि गरे ।
आगामी आवश्यक सचेतना, अत्यावश्यक स्वास्थ सामग्री, अनिवार्य उपचार, विविध क्षेत्रमा पर्याप्त राहत एवं विदेशमा अप्ठ्यारोमा रहेकाको उद्धार र पुनव्र्यवस्थापनमा अबको बजेट केन्द्रित हुनुपर्नेमा उनले जोड दिए । “आज शुरु भएको प्रतिनिधिसभाको यो बैठकले कोरोनामाथि विजय हासिल गर्न आवश्यक पर्ने सबै अत्यावश्यक कदमका बारे मार्गदर्शन गर्न र राष्ट्रिय एकतालाई अभिवृद्धि गर्न गराउन सक्नेछ”, नेता देउवाले मन्तव्य टुङ्ग्याउँदै भने ।
