एजेन्सी । सुडानको अदालतले २९ जना गुप्तचरका एजेन्टलाई मृत्युदण्डको सजाय सुनाएको छ । एकजना शिक्षकलाई हिरासतमा हत्या गरेको आरोपमा दोषी पाइएपछि सोमबार सुडानको अदालतले उनीहरुलाई मृत्युदण्डको सजाय सुनाएको हो ।
सुडानका पूर्वराष्ट्रपति ओमार अल-बसिरविरुद्ध प्रदर्शन गरेको आरोपमा उनलाई प्रहरीले नियन्त्रणमा लिएको थियो ।
सुडानको अदालतका न्यायाधीश साडोक अबडेलरहमानले २९ जना गुप्तचरका एजेन्टले अहमेद अल-खेरलाई अनुसन्धानका क्रममा सोधपुछ गर्दा यातना दिएको, सेवासुविधा नदिएको र हत्या गरेको आरोपमा दोषी ठहर भएकाले झुण्ड्याउने आदेश दिएका हुन् ।
सुडानको पूर्वी प्रान्त कासलाबाट जनवरी अन्तिमतिर पक्राउ परेका अहमेदलाई हिरासतमा कुटपिट गरिएको थियो । कुटपिटमा संलग्न भएको पाइएपछि अन्य तीनजना अधिकारीहरुलाई पनि तीन वर्षको जेल सजाय तोकिएको छ । अन्य सातजनालाई रिहा गर्नसमेत अदालतले आदेश दिएको छ ।
खेरका परिवारका अनुसार गुप्तचर संस्थाले भने उनी विष सेवनका कारण मृत्यु भएको दाबी गरिरहेको छ । तर, अनुसन्धानका क्रममा भने खेरको कुटपिटका कारण मृत्यु भएको पाइएको छ ।
