सुर्खेत । कर्णाली स्वास्थ्य विज्ञान प्रतिष्ठान जुम्लाको शिक्षाध्यक्षमा प्रतिष्ठानका डा. निरेश थापा नियुक्त भएको छ । प्रतिष्ठानका सहकुलपति स्वास्थ्य तथा जनसङ्ख्यामन्त्री भानुभक्त ढकालले मन्त्रिस्तरीय निर्णयबाट आज डा.थापालाई शिक्षाध्यक्षमा नियुक्त गरेको हो । प्रतिष्ठानका उपकुलपति प्रा. डा. राजेन्द्रराज वाग्लेले गत मङ्सिर ३० गते शिक्षाध्यक्ष नियुक्तिका लागि डा. थापा, डा. भरतमणि पोखरेल र डा. बद्री बडूलाई सहकुलपति समक्ष सिफारिस गरिएको थियो ।
निवर्तमान शिक्षाध्यक्ष डा. धर्मराज श्रेष्ठको कार्यावधि जेठ २५ गते सकिएपछि सात महिनादेखि प्रतिष्ठान शिक्षाध्यक्ष विहीन थियो । सहकुलपति ढकालले डा थापालाई चार वर्षीय कार्यकालसहितको शिक्षाध्यक्षको जिम्मेवारी प्रदान गरिएको प्रतिष्ठानका उपकुलपति प्रा. डा. राजेन्द्रराज वाग्लेले राससलाई जानकारी दिए ।
उपकुलपति प्रा. डा. वाग्लेले एक साताअघि प्रतिष्ठानको कार्य परिषद्ले अस्पताल निर्देशकमा प्रतिष्ठानमा कार्यरत हाडजोर्नी विशेषज्ञ डा. मङ्गल रावललाई जिम्मेवारी दिइएको बताए । “यतिबेला प्रतिष्ठानमै कार्यरत ऊर्जाशील जनशक्तिलाई जिम्मेवारी दिइएको छ,” उनले भने, “आशा गरौँ, अब प्रतिष्ठानको शैक्षिक, प्राज्ञिक तथा प्रशासनिक गतिविधि सञ्चालनमा सहजता आउनेछ ।”
