काठमाडौं । आयोजक सोतोकान कराते डो संघ (एसकेडियुएन) काठमाण्डौमा जारी तेश्रो राष्ट्रिय सोतोकान कराते च्याम्पियनसिप २०१९ को टिम च्याम्पियन बन्न सफल भएको छ । आयोजकले १२ स्वर्ण पदक हात पार्दै टिम च्याम्पियन बन्न सफल भएको हो । दोश्रो स्थानमा नेपाल निहोन सोतोकान कराते संघ र तेश्रो स्थानमा ईन्टरनेशनल मार्सल आर्ट संघ (आईएमए) भएका छन् । निहोनले २ स्वर्ण र आईएमएले एक स्वर्ण हात पारेको छ ।
प्रतियोगितामा आयोजक एसकेडियुएनका सागर चौलागाई पुरुष तर्फ र आईएसकेएफ सोतोकानकी खुस्बु जैसवाल महिला तर्फ उत्कृष्ट खेलाडी घोषित भएका छन् । बुढानिलकण्ड नगरपालिका २ महादेव खोलास्थित एसकेडियुएनको आफ्नै कभर्डहलमा भएको प्रतियोगिताको अनुशासित टिममा डब्लुएकेएफ सोतोकान कराते संघ रह्यो । आयोजक संघका विजय राई र आश्था थामी उदियमान खेलाडी घोषित भए ।
नेपाली काँग्रेसका नेता पूर्व उपप्रधानमन्त्री एवं प्रतिनिधी सभाका सांसद प्रकासमान सिंहले उद्घाटन गरेको प्रतियोगितामा विभिन्न जिल्ला र आयोजकका गरि १५० खेलाडीहरुको सहभागिता रहेको आयोजक संघका महासचिव एवं सहायक मुख्य प्रशिक्षक गोविन्द श्रेष्ठले जानकारी गराए । बिजयी खेलाडीहरुलाई बुढानिलकण्ठ नगरपालिकाका मेयर उद्धव प्रसाद खरेल लगायतले पुरस्कार वितरण गरेका थिए ।
