बाग्लुङ । बाग्लुङको बडिगाड मंगलबार बिहान भएको दुर्घटनामा ज्यान गुमाउनेको सनाखत भएको छ । दुर्घटनामा चालकसहित १४ जनाको घटनाास्थलमै मृत्यु भएको थियो । एकजनालाई बडिगाड खोलाले बगाएर वेपत्ता बनाएको छ ।घाइते ३ जनालाई थप उपचारका लागि काठमाडौं ल्याइने तयारी भइरहेको छ ।
१८ जना व्यक्तिसहित गुल्मीको इस्माबाट कुलपूजा (देवाली)का लागि बागलुङको देवीस्थान जाँदै गरेको ग १ ज ५२१९ नम्बरको जीप बडिगाड गाउँपालिका–७ घोपर्नाबाट खोलामा खसेको थियो ।
दुर्घटनामा गुल्मी इस्मा गाउँपालिका–५ का २५ वर्षीय चालक रेशम थापाको मृत्यु भएको छ । गुल्मी इस्मा गाउँपालिका– ५ कै २३ वर्षीया, माया थापा, इस्मा–५ का ४० वर्षीया वसुन्धरा कार्कीको घटनास्थलमै मृत्यु भएको प्रहरीले जनाएको छ । इस्मा–५ कै ४० वर्षीया सीता कार्की, सोही गाउँपालिकाका ४५ वर्षीय भूमि कार्की, २५ वर्षीया मिना कार्की, उमेर नखुलेका तुलसी कार्की र धनबहादुर कार्की रहेका छन् । त्यसैगरी इस्माकै ४० वर्षीय छवि कार्कीको मृत्यु भएको छ ।
दुर्घटनामा नवलपरासी बर्दघाटकी झुमा कार्की, बागलुङ बडिगाड–५ की ५५ वर्षीया लक्ष्मी केसीको पनि मृत्यु भएको प्रहरीले जनाएको छ । ठाउँ वतन नखुलेका सूचना कार्की रहेका छन् ।
दुर्घटनामा ज्यान गुमाएका पाँच वर्षीया बालिका र थप एकजनाको सनाखत हुन बाँकी छ ।
दुर्घटनामा नवलपरासी बर्दघाटका जीवन कार्की, रोल्पा घर, इस्मा माइती भएकी नीमा कार्की, इस्माकै हिमाल कार्की दुर्घटनामा घाइते भएका छन् । उनीहरूलाई थप उपचारका लागि काठमाडौं ल्याउने तयारी भइरहेको छ ।
