काठमाण्डौ । देशका विभिन्न भागमा गैरकानूनी रुपमा जुवातास खेल्ने खेलाउनेविरुद्ध नेपाल प्रहरीले थालेको अभियानका क्रममा जुवाको खालबाट आज एकसय तीनजना पक्राउ परेका छन् । भक्तपुर, गुल्मी, बर्दिया, चितवन र दाङबाट प्रहरीले जुवातास खेलिरहेको अवस्थामा पक्राउ गरेको हो ।
आज बिहान भक्तपुरको गुण्डु र ताथलीबाट १४ जना पक्राउ परेका र उनीहरूबाट रु तीन लाख नगद बरामद भएको छ । यसैगरी गुल्मीको गुल्मीदरबार गाउँपालिकाबाट १७ जनासहित रु दुई लाख ८२ हजार र बर्दियाको बाँसगढी र राजापुर क्षेत्रबाट ३१ जना समातिएका छन् । उनीहरूबाट रु दुई लाख ३६ हजार, तासका कैयौँ प्याकेट र कौडा बरामद गरिएको केन्द्रीय प्रहरी समाचार कक्षले जनाएको छ ।
चितवनको खैरहनी नगरपालिका र भरतपुर महानगरपालिका विभिन्न क्षेत्रबाट नियन्त्रणमा लिइएका ३२ जनाबाट रु पाँच लाख ७५ हजार खिचिएको छ । दाङको लमही नगरपालिका–५ आज बिहान पक्राउ गरिएका आठजनाबाट १६ गड्डी तास र ३२ थान कौडासहित नगद रु छ लाख ७८ हजार बरामद भएको छ ।
यस्तै काठमाण्डौबाट २५ जना झण्डै तीन करोड रुपैयाँसहित प्रहरीले पक्राउ गरेको थियो । देशभर तिहारको दाउ छोपी जुवा तास खेल्ने र पडका पड्काउनेहरुको नजर परेको भएपनि प्रहरीले यसपटक ठूलै उपलब्धी हाँशिल गरेको देखिएको छ । ठूलोमात्रामा जुवाडे पक्राउ पर्नु प्रहरी प्रशासनको सकारात्मक कदमको रुपमा लिनुपर्ने चियापसलमा कुरा गर्न थालेका छन् भने यसलाई आईजिपी खनालको सफलताको रुपमा पनि लिनुपर्ने सुरक्षविदहरुको ठम्याई छ ।
