प्रदेश 1

लगातार पहिरो खसेपछि सडक निर्माण ठप्प

खाँदबारी । सङ्खुवासभाको उत्तरी क्षेत्रमा लगातार पहिरो खसेपछि कोशी राजमार्गअन्तर्गत मकालु गाउँपालिकाको दोभान–बरुण नदी खण्डको सडक निर्माण ठप्प छ । वैशाखको पहिलो साता यता उक्त क्षेत्रमा नियमितरुपमा पहिरो खसेपछि सडक निर्माणको काम रोकिएको हो ।

सडक निर्माणका लागि सवारीसाधन लैजान नसक्दा काम अघि बढ्न सकेको छैन । नयाँबस्ती बरुण नदी खण्डमा पर्ने झण्डै २७ किलोमिटर क्षेत्रमा पहिरो नियमित झरिरहेको स्थानीयवासी बताउँछन् । निर्माणका लागि लगिएका ठूला सवारी साधन पहिरो खसेपछि दोभानमै थन्किएका छन् । सडक निर्माणको ठेक्का स्वामीनारायण आशिर्वाद जेभीले लिएको थियो । “डोजर र अन्य सवारीसाधन लैजान नसक्दा काम रोकिएको छ”, निर्माण कम्पनीका सन्तोष बस्नेतले भने, “झरी रोकिएपछि काम अघि बढ्छ ।” 

नयाँ बस्तीबाट बरुणसम्म सडक चौडा, पर्खाललगायत काम गरिने बस्नेतले बताए । उत्तरी क्षेत्रका विभिन्न ठाउँसम्म साँझ ५ बजेदेखि बिहान ८ बजेसम्म एकतर्फीरुपमा सवारीसाधन सञ्चालनमा छन् । उत्तर–दक्षिण कोशी सडक योजनाका प्रमुख गौतमकुमार श्रेष्ठका अनुसार दोभानबाट नयाँबस्तीसम्म झण्डै दुई किलोमिटर क्षेत्रमा सडक भत्किएको छ ।