राजनीति

लोकतन्त्र ल्याउन योगदान गर्ने नेताको सममान गर्न नसकेकोमा सभापति देउवा चिन्तित

काठमाण्डौ । नेपाली काङ्ग्रेसका सभापति शेरबहादुर देउवाले प्रजातन्त्र र लोकतन्त्रका लड्ने योद्धाहरुको उचित सम्मान हुन नसकेको बताएका छन् । काङ्ग्रेसका नेता एवं पूर्वमन्त्री स्वर्गीय मार्शल जुलुम शाक्यको ८०औँ जन्मजयन्ती एवं प्रतिमा अनावरण कार्यक्रममा उनले प्रजातन्त्र ल्याउन योगदान गरेका योद्धाहरुको उचित सम्मान गर्न नसकिएको बताएका हुन्।

“जनताको अधिकार र प्रजातन्त्र प्राप्तिको लागि मार्सल जुलुम गरेको अतुलनीय योगदानका कारण र देशको परिर्वतनका लागि एक होनाहार योद्धा भएकै कारण देशमा परिर्वनतको रेखामा हिँडिरहेको छ”, उनले भने । सभापति देउवाले पूर्वमन्त्री शाक्यको तत्कालीन राजा स्वर्गीय महेन्द्रले विसं २०१७ मा प्रजातन्त्रमाथि ‘कु’ गरेपछि स्वर्गीय शाक्यले राजाको विरुद्ध आन्दोलनमा देखाएको साहस, निडर र नेतृत्वको प्रशंसासमेत गरे ।

काङ्ग्रेस केन्द्रीय सदस्य एवं पूर्वमन्त्री नवीन्द्रराज जोशीले शाक्यलाई तत्कालीन पञ्चायती व्यवस्थाले गिरफ्तार गरेको स्मरण गरे । नेता जोशीले प्रजातन्त्र स्थापना र पुनःस्थापनाका क्रममा सञ्चालित हरेक आन्दोलन र संघर्षमा संलग्न रहँदा १४ वर्षभन्दा बढी समय शाक्यले जेलजीवन व्यतित गरेको चर्चा गरे । काङ्ग्रेस केन्द्रीय सदस्य ध्यानगोविन्द रञ्जितले स्वर्गीय शाक्यजस्ता अथक योद्धाहरुको नेतृत्व वर्गले उचित मुल्याङ्कन गर्न नसकेको गुनासो गर्दे योद्धाको इतिहास भावी पुस्तालाई सधैँ बुझाउन जरुरी रहेको बताए ।

काङ्ग्रेस काठमाडौँका पूर्व सभापति एवं सांसद भीमसेनदास प्रधानले शाक्य निवासको सोही घरमा भूमिगत समयमा नेपाली काङ्ग्रेसका शीर्ष नेताहरुसहित राजनीतिज्ञले राजनीतिक रणनीति बनाउने गरेको सम्झना गरे । काङ्ग्रेस नेता तीर्थराम डङ्गोलले परिर्वतनका लागि लड्ने योद्धाहरु ईतिहासका पानमा सधैँ अटाइरहने बताए । ओम बहालको मिमनमी बहालस्थित स्वर्गीय शाक्यको निवासमा प्रतिमा स्थापना गरिएको हो । शाक्य विसं २०४७ सालको अन्तरिम मन्त्रिपरिषद्मा वाणिज्य तथा आपूर्तिमन्त्रीभएका थिए ।