भक्तपुर । सञ्चार तथा सूचना प्रविधिमन्त्री गोकुल बाँस्कोटाले पहिरो रोकथामका लागि तत्काल आवश्यक पहल गर्न आग्रह गरेका छन् । मध्यपुरथिमि नगरपालिका–१ लोकन्थलीमा आज बिहान गएको पहिरोका कारण भएको क्षतिको अवलोकन गर्दै उनले थप क्षति हुन नदिन तत्काल आवश्यक कार्य गर्न सम्बन्धित निकायलाई आग्रह गरेका हुन् ।
बस्ती र सडकमुनि भिरालो सार्वजनिक जमीनमा खानेपानी ट्याङ्की निर्माण गर्ने क्रममा पहिरो जाँदा कालोपत्र सडक पूरै बगाएको छ भने पाँच वटा पक्की घर उच्च जोखिममा परेका छन् । जोखिममा परेका घरका सामान सुरक्षित स्थानमा लगिएको छ । घरको पेटीसम्म पहिरो गएर घर जोखिममा परेको जानकारी पाएलगत्तै घटनास्थल पुगेका मन्त्री बाँस्कोटाले घटनाका बारेमा पूर्णरूपमा जानकारी लिएका थिए ।
त्यसैगरी पहिरो गएको क्षेत्रको अनुगमन गर्न पुगेका सांसद एवं पूर्वउद्योगमन्त्री महेश बस्नेतले लापरवाही गर्ने र घटनामा दोषी देखिएकालाई कारवाही गर्न प्रमुख जिल्ला अधिकारी नारायण भट्टलाई आग्रह गरे ।
तत्काल जोखिमयुक्त घरलाई सुरक्षित गर्न नगरपालिकाको इञ्जिनीयर, दक्ष कर्मी, नेपाली सेना, नेपाल प्रहरी र सशस्त्र प्रहरीको टोलीसहित आवश्यक सामान उपलब्ध गराई जोखिममुक्त गर्ने, घटनाको अनुसन्धान गरी दोषीलाई कारवाही गर्ने र सङ्घ, प्रदेश र स्थानीय सरकारका निर्वाचित प्रतिनिधिको पहलमा बजेट व्यवस्थापन गरी दीर्घकालीन समस्या समाधान गरिने बस्नेतले बताए ।
आजै मध्यपुरथिमि नगरपालिकाका प्रमुख मदनसुन्दर श्रेष्ठ, नेकपा भक्तपुर जिल्ला अध्यक्ष वचन देउजा, प्रमुख जिल्ला अधिकारी भट्ट, वीरदल गणका गणपति शिवप्रसाद पौडेल, भक्तपुर सडक विभागका प्रमुख बेलबहादुर भुजेल, महानगरीय प्रहरी परिसर भक्तपुर प्रमुख सविन प्रधान, गुह्येश्वरी सशस्त्र गणका प्रमुख विश्व भट्टराईलगायतको टोलीले पहिरो गएको क्षेत्रको अनुगमन गरेको थियो ।
मध्यपुरथिमि नगरपालिका–१ लोकन्थलीमा पानी ट्याङ्की निर्माणका लागि खाडल खन्दा आज बिहान पहिरो जाँदा पाँच घर उच्च जोखिममा परेको हो । खानेपानी समस्या समाधान गर्न सरकारको रु एक करोड ३२ लाखको लागतमा वडा नं १ को भिरालो सार्वजनिक जग्गामा पाँच लाख लिटर क्षमताको ट्याङ्की बनाउने क्रममा पहिरो गएको थियो ।
गत वैशाख महीनादेखि ट्याङ्की निर्माणका लागि खन्न थालिए पनि वर्षा शुरु भएको भन्दै ठेकेदारले काम रोकेर पुनः भदौ १ गतेदेखि खन्दा रुखसमेत ढलेर गएको पहिरोले पक्की घर जोखिममा परेका हुन् ।
