बेझाड । रामपुर नगरपालिका क्षेत्रमा कार्यरत श्रमिक मजदुरहरुलाई काममा हौसला बढाउन प्रोत्साहन रकम प्रदान गरिएको छ । पूर्वी पाल्पा मजदुर व्यवस्थापन समितिले निर्माण क्षेत्रका अगुवा मजदुरलाई घर ढलानको सङ्ख्याको आधारमा प्रतिढलान रु दुईका दरले प्रोत्साहन प्रदान कार्य शुरु गरेको हो ।
समितिमा आबद्ध भएकामध्ये ५४ अगुवा मजदुरलाई प्रोत्साहन रकम प्रदान गरिएको समितिका अध्यक्ष माधव पोखरेलले बताए । “श्रमिक मजदुर भनेपछि सबैले हेयको दृष्टिकोण राख्ने प्रवृत्ति अझै पनि कायमै छ, उनीहरुको पेशालाई मर्यादित र सम्मानित बनाउन प्रोत्साहन रकम प्रदान कार्यक्रम शुरु गर्न थालेका हौँ”, उनले भने ।
गत आर्थिक वर्षमा संस्थामा आबद्ध अगुवा मजदुरको नेतृत्वमा ५०५ घर तथा भवनहरुको ढलान भएको थियो । मजदुर पनि सम्मानित हुने अवसर आएकोमा खुशी व्यक्त गर्दै प्रोत्साहन रकमले काममा झन् हौसला बढेको मानबहादुर लामाले बताए ।
“मजदुरलाई हेर्ने दृष्टिकोण नै नराम्रो रहेका बखत यस्ता कार्यक्रमले काममा मनोबल बढ्दै जानेछ”, उनले भने । मजदुरको हकहितका लागि समितिले रु दुई लाखसम्म निःशुल्क दुर्घटना बिमा पनि गरिदिएको छ । रामपुर क्षेत्रमा करीब दुई हजार ५०० को हाराहारीमा श्रमिक मजदुर रहेका छन् । त्यसमध्ये पूर्वी पाल्पा मजदुर व्यवस्थापन समितिमा एक हजार मजदुर आबद्ध छन् ।
एक घर एक धारा खानेपानी आयोजना सम्पन्न
पाल्पाको पूर्वखोला गाउँपालिका–३ रिङ्नेरहको द्वारीगौँडाको वृत्ताबजारमा एक घर एक धारा खानेपानी आयोजना निर्माण सकिएको छ । यहाँका ४९ घरपरिवारका लागि खानेपानीको सुविधा पुर्याउन एक घर एक धारा कार्यक्रम सञ्चालन गरिएको हो । खानेपानी आयोजना सम्पन्न भई गाउँका घर–घरमा पानी वितरण भएपछि खानेपानी बोक्ने झन्झट हटेको सिर्जना खनालले बताए ।
गोरखा वयरफेयरको रु १९ लाख दुई हजार ५०० र उपभोक्ताबाट रु १८ लाख ९६ हजार ५३७ गरेर जम्मा रु ३७ लाख ९९ हजार ३७ को लागतमा खानेपानी आयोजना सम्पन्न गरिएको हो । दुई सेफ्टीट्याङ्की, सात हजार घनलिटर र चार हजार घनलिटरको ट्याङ्कीमा दुई मूलको पानी जम्मा गरी गाउँमा खानेपानी लगिएको छ ।
एक घर एक धाराको अवधारणासहित निर्माण भएको आयोजनाले सहजरूपमा खानेपानीको सुविधा पुग्ने खानेपानी उपभोक्ता समितिका अध्यक्ष थमकुमारी सारुले बताए । हिउँदयाममा गाउँमा खानेपानीको समस्याले सास्ती खेप्दै आइरहेका यहाँका स्थानीयवासी एक घर एक धारा आयोजना कार्यक्रमबाट दङ्ग छन् ।
