दारे सलाम । दारे सलाम, पूर्वी अफ्रिकी मुलुक तान्जानीया भ्रमण गर्ने पर्यटकको संख्या सन् २०१८ मा १५ लाख पुगेको तान्जानीयाका सरकारी अधिकारीहरुले बताएका छन् । सन् २०१७ मा तान्जानीया भ्रमण गर्ने पर्यटकको संख्या १३ लाख थियो ।
प्राकृतिक स्रोत तथा पर्यटन मन्त्रालयका सचिव एडोल्फ एम्केन्डेले पर्यटक वृद्धिका कारण दुई अर्ब ४० करोड अमेरिकी डलर बराबरको आर्थिक क्रियाकलाप भएको जानकारी दिनुभयो । उहाँले अघिल्लो वर्ष सन् २०१७ मा पर्यटन क्षेत्रमा दुई अर्ब ३० करोड डलर बराबरको आर्थिक क्रियाकलाप भएको थियो ।
दारे सलाममा आयोजित पत्रकार सम्मेलनमा सम्बोधन गर्दै सचिव एडोल्फले संयुक्तराज्य अमेरिकाबाट सबैभन्दा बढी पर्यटक तान्जानीया आएको जानकारी दिए । कूल पर्यटक आगमनमध्ये अमेरिकाबाट १५.६ प्रतिशत रहेको थियो भने त्यसपछि बढी पर्यटक आएका मुलुकमा केन्या र संयुक्त अधिराज्य रहेका थिए ।
उनले मुलुकको कूल विदेशी मुद्रा आर्जनमध्ये पर्यटन क्षेत्रले करिब २५ प्रतिशत हिस्सा ओगटेको तथा कूल गार्हस्थ्य उत्पादनको करिब १७ प्रतिशत योगदान गरेको पनि बताए ।
तान्जानीयामा पर्यटकलाई आकर्षित गर्न पछिल्ला वर्षहरुमा व्यापक प्रबद्र्धनात्मक क्रियाकलापहरु सञ्चालन गरिएको छ । तान्जानीयामा निकै आकर्षक र रमाइला पर्यटकीय गन्तव्यहरु रहेका छन् ।
