काठमाडौँ । प्रज्ञा भवनमा नेपाल प्रज्ञा–प्रतिष्ठान, दर्शनशास्त्र विभागद्वारा ‘योगदर्शन, जीनशैली र स्वास्थ्य’ विषयक विचार गोष्ठीको आयोजना गरियो ।
कार्यक्रमका प्रमुख अतिथि वाङ्मय शताब्दी पुरुष सत्यमोहन जोशीले कार्यक्रमलाई सम्बोधन गर्दै सकेसम्म जीवनमा योगलाई सबैले अनुसरण गर्न सके लाभदायी हुने विचार व्यक्त गरे । उनले योगलाई संस्कृतिसँग जोडिनुपर्नेमा जोड दिँदै संस्कृतिबिनाको योग खल्लो हुने बताए ।
प्रज्ञा–प्रतिष्ठानका पूर्व कुलपति बैरागी काइँलाले गोष्ठी ज्ञानमूलक भएको भन्दै मानिसको जीवनमा योगको ठूलो महत्व रहने बताए । उनले भने, “योगले स्वस्थ जीवनका साथै जीवनलाई विभिन्न कोणबाट हेरिनुपर्छ भन्ने कुराको पनि ज्ञान दिन्छ ।”
प्रज्ञा–प्रतिष्ठानका सदस्य सचिव एवम् दर्शनशास्त्र विभाग प्रमुख प्रा. जगत्प्रसाद उपाध्यायले योगदर्शन नेपाली दर्शन भएको उल्लेख गर्दै मानिसको बदलिँदो जीवनशैलीका कारण पनि योगबारे प्रशस्त विचार–विमर्श गरिनुपर्ने बताए । योगदर्शनले मानिसको मन र शरीरलाई संयोजन गर्ने उनको दाबी थियो । सदस्य सचिव उपाध्याले प्रज्ञा–प्रतिष्ठानले चाँडै नै पचास जति दर्शनका विषयलाई समेटेर ‘नेपाली दर्शन’ नामक ग्रन्थ प्रकाशन गरिने योजना रहेको सुनाए ।
कार्यक्रममा योग तथा प्राकृतिक चिकित्सक डा. हरिप्रसाद पोखरेल ‘मानसाग्नि’ले ‘योगदर्शन, जीवनशैली र स्वास्थ्य’ विषयक कार्यपत्र प्रस्तुत गरे । कार्यपत्रमा उनले योग शब्दको अर्थ, योगदर्शनको उदय र विकास, योगको परम्परा, नेपाली सभ्यता र योग, यौगिक जीवनशैली र स्वास्थ्यका बारेमा प्रकाश पार्दै मानव जीवनमा योगको महत्वका बारेमा प्रकाश पारेका थिए ।
कार्यपत्रमाथि प्रा.डा. नन्दबहादुर सिंह, दीर्घराज प्रसाईं, इन्दिरा ढकाल लगायतले विभिन्न जिज्ञासा राख्नुका साथै परिपूरक छलफल गरेका थिए ।
कार्यक्रममा दर्शनशास्त्र विभागका सदस्य विष्णु प्रभातले विषयवस्तुबारे प्रकाश पारेका थिए भने योगयात्री विष्णु गिरीले नाकबाट पानी पिउने र बाहिर निकाल्ने कला प्रस्तुत गरेका थिए भने दुर्गा पन्त र स्वस्तिका पन्तले योगकला प्रदर्शन गरेका थिए ।
