केप टाउन । दक्षिण अफ्रिकी राष्ट्रपति सिरिल रामाफोसाले आगामी एक दशकभित्रै दक्षिण अफ्रिकामा हिंसात्मक अपराधका घटनामा कम्तीमा आधा घटाउने प्रतिबद्धता व्यक्त गरेका छन् । राष्ट्रपति रामाफोसाले मङ्गलबार संसदको विशेष सत्रमा सम्बोधन गर्दै सरकारको यस अभियानमा सहयोग गर्न सबैसँग आग्रह गरे । उनले सामाजिक समस्यासँग जुध्न राष्ट्रव्यापी अभियान नै आवश्यक रहेकामा जोड दिए।
राष्ट्रपतिमा गत मे महिनामा पुनः निर्वाचित भएपछि यो उनको संसदमा पहिलो सम्बोधन हो । दक्षिण अफ्रिकी आधिकारिक विवरण अनुसार सन् २०१७ को अप्रिलदेखि २०१८ को अप्रिलको एक वर्षको अवधिमा अघिल्लो वर्षको तुलनामा व्यक्तिसँग जोडिएका हिंसात्मक घटनामा ५ प्रतिशत वृद्धि भई १६ लाख पुगेको देखिएको छ ।
आपराधिक हिंसाका घटनामा कमी ल्याउन रामाफोसाले प्रहरीको संख्या वृद्धि गरिने बताए । उनले प्रहरी सेवामा विद्यार्थीहरुलाई सहभागी गराइने, हिंसात्मक घटना न्यूनीकरणका लागि नागरिकको सहभागिता बढाइने, प्रहरी अनुसन्धानको सफलता दर वृद्धि गर्ने तथा अपराधीमाथि कडाईका साथ कारबाही गरिने बताए ।
उनले महिलामाथि हुने हिंसात्मक घटनामा कमी ल्याउने उपायको खोजी गर्न रणनीतिक योजना ल्याइने तथा उच्चस्तरीय एक परिषद गठन गरिने बताए । राष्ट्रपति रामाफोसाले लागूऔषधको कारोबारलाई निस्तेज तुल्याउन विशेष कार्यबाही अघि बढाउने पनि घोषणा गरे ।
