राजनीति

२/३ मातको ओली सरकारले देश /जनताका पक्षमा सिन्कोपनि भाँच्न सकेनः वरिष्ठ नेता पौडेल

काठमाण्डौ । नेपाली काङ्ग्रेसका वरिष्ठ नेता रामचन्द्र पौडेलले मुलुकमा दुई तिहाईको सरकार भए पनि जनताको आकांक्षा बमोजिमको परिवर्तन नभएको जिकिर गरेका छन् । नेता पौडेलले सरकारले देश र जनताका पक्षमा सिन्कोपनि भाँच्न नसकेको भन्दै भरोसा गरेर दिएको मत खेर गएको आफूलाई कम्युनिष्टलाई मतदान गर्ने मतदाताले बताएको दाबी गरेका छन् ।

मानव अधिकार तथा शान्ति समाजको २४औँ वर्ष गाँठका अवसरमा आज आयोजित अन्तरक्रियामा उनले गरीब तथा निमुखा दुःखी जनताले चाहेको आर्थिक समृद्धितिर सरकारको ध्यान नगएको बताए।

उनले जनताले दिएको मतको दुरुपयोग गर्दै वर्तमान सरकारले प्रेसलाई तर्साउने काम गरेको, मानव अधिकारमाथि अङ्कुश लगाएको तथा प्रजातन्त्रको मर्ममाथि कुल्चिएको आरोप लगाए । उनले नेपाली जनताले अब हिंसा थाम्न नसक्ने भएकाले सबैले हिंसाको बाटो परित्याग गर्नुपर्नेमा जोड दिए ।

नेपाल कम्युनिष्ट पार्टी (माले) का महासचिव सीपी मैनालीले बहुधार्मिक मुलुकमा हिन्दूधर्म लाद्न खोजे उत्पीडित जनजाति तथा धर्मावलम्बीलाई अधिकार सम्पन्न गर्ने उद्देश्य विपरीत हुने बताए । प्रतिनिधिसभा, राज्य तथा सुशासन व्यवस्था समितिका सभापति शशि श्रेष्ठले राज्यमा केही व्यक्तिको हाली मुहाली भए भोलिका दिन अँध्यारो हुने भएकाले सर्वसाधारण जनताले सचेत हुनुपर्नेमा जोड दिए ।

वरिष्ठ अधिवक्ता शम्भु थापा, अधिवक्ता भीमार्जुन आचार्य, शान्ति समाजका संस्थापक अध्यक्ष कृष्ण पहाडी, सल्लाहकार होमकान्त चौलागाई लगायतले नेपालमा हालसम्म जारी भएका सात वटा संविधानमा वर्तमान संविधान तुलानात्मक रुपमा प्रगतिशील भएकाले यो संविधान असहमतिबीचको सहमतिको दस्तावेज भए पनि पूर्ण भने नभएको बताए ।