रुपन्देही । प्रदेश नं ५ का मुख्यमन्त्री शङ्कर पोखरेलले कानूनमा नागरिकको पहुँच बढाउनुपर्ने बताएका छन् ।
कानून, न्याय तथा संसदीय मामिला मन्त्रालयले आज बुटवलमा आयोजना गरेको देवानी र फौजदारीसंहिता सम्बन्धी अन्तक्र्रिया कार्यक्रमलाई सम्बोधन गर्दै मुख्यमन्त्री पोखरेलले नागरिकले व्यावहारिक हिसाबले मात्रै कानूनी प्रक्रिया बुझ्ने गरेकाले सैद्धान्तिक ज्ञान आवश्यक रहेकोमा जोड दिए ।
उनले भने, “कानून नबुझ्नेले व्यवहारको भाषा बुझ्छन्, कानून पढेर पालना गर्ने संस्कृति बन्नसकेको छैन ।’ मुख्यमन्त्री पोखरेलले देशको कानूनबारे अनभिज्ञता क्षम्य नहुने भएकाले नागरिकस्तरमा चेतना प्रवाह गर्नु आवश्यक भएको बताए ।
कार्यक्रममा आन्तरिक मामिला तथा कानूनमन्त्री कुलप्रसाद केसीले न्यायालयप्रति जनताको विश्वास बढाउन जरुरी रहेको बताए । न्यायालयमा जाँदा म सुरक्षित छु भन्ने भावनाको विकास गराउनुपर्ने उनको भनाइ छ ।
कार्यक्रममा देवानी र फौजदारीसंहिता सम्बन्धी प्रस्तुति गर्दै जिल्ला अदालत रुपन्देहीका मुख्य न्यायाधीश नरिश्वर भण्डारीले प्रचलित कानूनका विषयमा सरोकारवालाले जति चासो लिन्छन् त्यति नै प्रभावकारी कार्यान्वयन हुने विचार व्यक्त गरे । उनले देवानी र फौजदारीसंहिता २०७४ मा उल्लेख प्रावधानबारे जानकारी गराउँदै यसको कार्यान्वयनका लागि सरकार सक्रिय हुनुपर्ने बताए ।
सहभागीले न्यायिक जनशक्तिको विकास गरेर न्यायालयको भूमिका प्रभावकारी बनाउनुपर्ने बताए । सरकारले देवानी र फौजदारी संहिताको स्वामित्व लिएर कार्यान्वयनमा सक्रियता देखाउनुपर्ने धारणा राखे । कार्यक्रममा प्रदेशसभाका सदस्य, सुरक्षा निकायका प्रमुख, स्थानीय तहका प्रतिनिधिको सहभागिता रहेको थियो ।
