गण्डकी प्रदेश

गौसंरक्षण केन्द्रका गाई व्यवस्थापनमा समस्या

दमौली । तनहुँको शुक्लागण्डकी नगरपालिका–९ घारीमा निर्माण हुँदै गरेको गौसंरक्षण केन्द्रका गाई व्यवस्थापनमा समस्या उत्पन्न भएको छ ।

दिनदिनै छाडा गाई थपिने क्रम बढेसँगै संरक्षण केन्द्रलाई नै गाई व्यवस्थापनमा समस्या उत्पन्न भएको हो । त्यसले गर्दा संरक्षण केन्द्रका चार गाई मरेको छ । छाडा चौपाया व्यवस्थापनका लागि शुक्लागण्डकी नगरपालिकाको रु १७ लाखको लगानीमा निर्माण हुँदै गरेको केन्द्रमा रहेका २५० मध्ये चार गाई मरेको शुक्लागण्डकी नगरपालिका–९ का अध्यक्ष लोकनारायण श्रेष्ठले जानकारी दिए।

केन्द्रमा दिनदिनै गाईहरु थपिने क्रम बढेसँगै आहारा अभाव हुन थालेको छ । उनका अनुसार संरक्षण केन्द्रमा दैनिक १० गाई थपिएका छन् । “खानेकुराको प्रबन्ध राम्रोसँग गर्न सकिएको छैन, तराईबाट रु ६० हजारमा ल्याइएको परालसमेत सकिएको छ”, उनले भने। गाईलाई पानी खुवाउन सोही ठाउँमा पोखरी खनिएको छ । तर उक्त पानी स्वस्थ छ कि छैन भनेर परीक्षण गर्न समस्या परेको छ । “गाईहरु दैनिकरूपमा थपिदै जाने र गाईलाई आहारा खुवाउन नसक्दा समस्या हुने देखिएको छ”, उनले भने।

गाईहरुले संरक्षण केन्द्रकै हाताभित्र रहेको दुवो घाँस खाएकाले केन्द्रको चौर बालुवामा परिणत भएको छ । केन्द्रका गाईको हेरचाहका लागि नगरपालिकाबाट केही दिनअघि मात्रै दुई हेरालो खटाइएको छ । हेरालोले गाईलाई घाँस भएको ठाउँमा चराउन लैजाने भएका छन् । “खानेकुरा नपुगेपछि समय मिलाएर गाईलाई चराउन लैजाने व्यवस्था मिलाएका छौँ”, उनले भने।

नगरपालिका क्षेत्रमा छाडा चौपायाको समस्या भएपछि निर्माण शुरु भएको संरक्षण केन्द्र अझै सकिएको छैन । गौसंरक्षण समितिका संयोजक गीता महतका अनुसार हाल ट्रष्ट निर्माणको काम भइरहेको छ । ६०० रोपनी क्षेत्रफलमा फैलिएको केन्द्रमा जग्गालाई तारबार, चौपायाका लागि खानेपानीको लागि पोखरी निर्माण भइसकेको छ । छाडा छोडिएका चौपायाको कारण राजमार्गमा सवारी दुर्घटना हुने, यातयात अवरोध हुने, बालबालिका, महिला तथा ज्येष्ठ नागरिक त्रसित हुने गरेको र चौपायाको मलमूत्रले बजार क्षेत्र नै दुर्गन्धित हुन थालेपछि नगरपालिकाले संरक्षण केन्द्र स्थापना गर्ने निर्णय गरेको थियो ।