चिसिनाउ । मोल्दोभामा आइतबार संसदका लागि मतदान हुँदैछ । सोभियत रुसबाट टुक्रिएको मोल्दोभामा हुने यस चुनावमा रुस समर्थक र युरोप समर्थकबीच कडा टक्कर हुने अनुमान गरिएको छ । सोभियत युनियन सन् १९९१ मा विघटन भएसँगै स्वतन्त्रता प्राप्त गरेको मोल्दोभा रुस र युरोपेली मुलुकको तानातानमा फसेको छ ।
करिब ३५ लाख जनसंख्या रहेको मोल्दोभाका बहुसंख्यक जनता मस्कोसँग घनिष्ट सम्बन्ध बनाउन चाहन्छन्, तर रोमानीयाको मोडेल पछ्याउन उपयुक्त हुने सुझाव पनि धेरैको छ । मोल्दोभाको भाषा र इतिहास दुबै रोमानीयासँग मिल्दोजुल्दो छ । रोमानीया पहिल्यै युरोपेली युनियन ९इयू०मा आबद्ध रहेकाले मोल्दोभा पनि इयूमा सामेल हुनुपर्ने धारणा केहीको छ ।
चुनावमा रसिया समर्थित समाजवादी पार्टीका नेता एवं राष्ट्रपति आइगोर डोडोन, सत्तारुढ प्रजातान्त्रिक पार्टी र युरोप समर्थित गठबन्धनबीच प्रतिस्पर्धा हुनेछ । यो चुनाव नयाँ चुनावी प्रणाली बमोजिम हुँदैछ । १०१ सदस्यीय संसदमा पार्टीको सूची र चुनावी क्षेत्रबाट सांसदहरु चुनिनेछन् । चुनावी मतसर्वेक्षणमा डोडोनको रुस समर्थित दल अगाडि रहेको देखिएको छ । डोडोनले मोल्दोभालाई रुसको अगुवाईमा निर्माण गरिएको युरेसियाली आर्थिक यूनियनमा आबद्ध गराउन चाहनु भएको छ ।
