बेझाड । पाल्पा रामपुर नगरपालिका–६ तातोपानीस्थित रु ५० लाखको लागतमा गौशाला निर्माण हुने भएको छ । रामपुर नगरपालिकाको सहयोगमा निर्माण हुन लागेका गौशालाको आज पतञ्जली योग पीठका आयुर्वेद शिरोमणि आचार्य बालकृष्ण जी महाराजले शिलान्यास गरे ।
सो अवसरमा उनले दीर्घ जीवन जीउनका लागि जैविक, प्राकृतिक तत्व रहेको गाईको पिसाब अत्यन्तै महत्वपूर्ण रहेको बताउँदै गौशाला निर्माण कार्यमा पतञ्जली योग पीठले रु ११ लाख सहयोग गर्ने घोषणा गरे ।
गौशाला निर्माणका लागि नगरपालिकाले रु २० लाख बजेट विनियोजन गरिएको नगर प्रमुख रमणबहादुर थापाले बताए । पन्ध्र रोपनी क्षेत्रफलमा निर्माण हुन लागेको गौशाला एक वर्षभित्र सम्पन्न गर्ने योजना छ ।
दुई सय ५० गाई अट्ने क्षमताको गौशाला निर्माण हुने वडा नं ६ का अध्यक्ष हुमनाथ न्यौपानेले जानकारी दिए । रामपुर नगरपालिका क्षेत्रमा पछिल्लो समय छाडा पशु चौपायाले सताउन थालेपछि त्यसको व्यवस्थापन र गाईको संरक्षण गर्न गौशाला निर्माण कार्य शुरु गर्न लागिएको हो ।
