काठमाडौँ । काठमाडौँ महानगरपालिका–२६ वडा कार्यालय भवनको आज शिलान्यास गरिएको छ । पुरानो भवन २०७२ सालको भूकम्पका कारण जीर्ण बनपछि नयाँ भवन निर्माण थालिएको हो ।
आज लैनचौरमा काठमाडौँ महानगरपालिकाका प्रमुख विद्यासुन्दर शाक्यले सो भवन शिलान्यास गरे । उनले महानगरपालिकाले केन्द्रीय कार्यालयदेखि ३२ वटै वडामा नमूना भवन निर्माण गर्न लागिएको बताए । “महानगरपालिकाले सबै वडा कार्यालयलाई व्यवस्थित गर्न लागेको छ”, शाक्यले भने । महानगरपालिकालाई सफा गर्न पाँच बु्रमर खरीद गरिएको उनले जानकारी दिए ।
प्रदेश नं ३ का प्रदेशसभा सदस्य जीवन डँगोलले स्थानीय तह, प्रदेश र सङ्घीय सरकारको समन्वय भए मात्र मुलुकको विकास हुने बताए । काठमाडौँ महानगरपालिका उपप्रमुख हरिप्रभा खड्गीले समृद्ध नेपालका लागि महानगर समृद्ध तथा महानगर समृद्धका लागि वडा समृद्ध हुनुपर्ने बताए ।
रु चार करोड ५० लाखमा आठ आना जग्गामा निर्माण गर्न लागिएको सो वडा कार्यालय भवन साढे तीन तले हुने वडाध्यक्ष ख्यामराज तिवारीले जानकारी दिए । एक वर्षभित्र निर्माण गरिने सो भवन निर्माणको जिम्मा गौरीपार्वती र केएनकेजी जेभीलाई दिइएको छ ।
