सुदूरपश्चिम

सुदूरपश्चिम सरकारको निर्णय: अस्पताल समिति गठन प्रक्रिया अघि बढाइने

धनगढी । सुदूरपश्चिम प्रदेशका विभिन्न अस्पतालमा व्यवस्थापन समिति गठनका लागि आवश्यक प्रक्रिया अघि बढाउने निर्णय बुधवार बसेको मन्त्रिपरिषद् बैठकले गरेको छ ।

बैठकले समिति गठनका लागि आवश्यक प्रक्रिया अघि बढाउने निर्णय गरेको सुदूरपश्चिम प्रदेश सरकारका प्रवक्त प्रकाशबहादुर शाहले जानकारी दिए । अधिकांश अस्पतालका व्यवस्थापन समिति लामो समयदेखि रिक्त रहेका छन् ।

बैठकले सामाजिक विकास मन्त्रालय मातहत रहेका सबै अस्पतालको नाम परिवर्तन गर्ने निर्णय गरेको उनले जानकारी दिए । आन्तरिक मामिला तथा कानून मन्त्रालयको कानून तर्जुमा सुझाव समितिसम्बन्धी कार्यविधि–२०७५ पनि बैठकले स्वीकृति प्रदान गर्ने निर्णय गरेको बताइएको छ ।

बैठकले धनगढीको फाप्ला क्रिकेट मैदानका लागि आवश्यक जग्गा व्यवस्थापन गर्न नेपाल सरकारलाई अनुरोध गर्ने निर्णयसमेत गरेको छ ।