टीकापुर । छोटी भन्सार कार्यालय खक्रौलामा स्तरोन्नति गरिएको तीन महीनाको अवधिमा गत वर्षको सोही अवधिको तुलनामा तेब्बर राजश्व असुली भएको छ । गत कात्तिक ५ गतेदेखि काम थालेको सो भन्सारमा यही माघ ११ गतेसम्म रु एक करोड ८६ लाख ४६ हजार राजश्व सङ्कलन भएकोे छ । छोटी भन्सार हुँदा गत वर्षको यही अवधिमा रु ५५ लाख ५८ हजार मात्र राजश्व सङ्कलन गरेको थियो ।
खक्रौला भन्सार कार्यालयका प्रमुख वसन्तकुमार केसीले आगामी फागुनबाट मासिक रु एक करोड राजश्व उठने लक्ष्य लिइएको बताए । उनले बाटोको स्तरोन्नति, व्यापार सहजीकरण, व्यापारीसँगको समन्वय र चोरी तस्करी नियन्त्रण गर्ने नीतिलाई कार्यालयले प्राथमिकता दिइरहेको बताए । खक्रौलाभन्दा पारी भारततर्फ तिकुनियाको बाटो साँघुरो भएकाले ठूला सवारीसाधन आवतजावतमा कठिनाइ रहेको छ ।
अन्तर्राष्ट्रिय भन्सार दिवसको अवसरमा शनिबार भएको कार्यक्रममा भारततर्फको भन्सारका प्रमुख लालताप्रसाद पनि उपस्थित थिए । भन्सार प्रमुख प्रसादले भारततर्फको बाटो यसै वर्ष बन्ने जानकारी दिएका थिए । कार्यक्रममा उत्कृष्ट भन्सार एजेन्ट ऋषिराम जमरकट्टेल र भन्सार कार्यालय सहयोगी कालु थापालाई सम्मान गरिएको थियो ।
