बाग्मती

हेलम्बु राजमार्गको पुनःनिर्माण सुस्त

काभ्रेपलाञ्चोक । आपत्कालीन भूकम्पीय सहायता योजनाअन्र्तगत हेलम्बु राजमार्गको स्तरोन्नति एवं पक्की सडक बनाउने पुनःनिर्माण काममा सुस्तता देखिएको छ ।

काभ्रेपलाञ्चोकको पाँचखालस्थित जिरोकिलोदेखि सिन्धुपाल्चोकको मेलम्चीसम्म २३ किलोमिटर सडकमध्ये हालसम्म १६ किलोमिटर मात्रै स्तरोन्नति भएको हो । २०७४ कात्तिकबाट शुरु भएको योजना २०७६ कात्तिकमा सक्नुपर्ने सम्झौता छ ।

एशियाली विकास बैंकको सहयोगमा स्तरोन्नति एवं कालोपत्रे गरिने उक्त पाँचखाल–मेलम्ची सडक एक वर्षको अवधिमा ३० प्रतिशत मात्रै काम सकिएको छ । सडक क्षेत्रका टेलिफोन तथा बिजुलीका पोल हटाउने काममा ढिलाइ हुनु तथा सडक दायाँबायाँका जग्गा अधिग्रहण, घर–टहरा भत्काउने विषयमा उत्पन्न विवादले सडक स्तरोन्नतिको काम ढिलाइ भएको योजनाका इञ्जिनीयर दिनेशकुमार महतोले बताए ।
उनका अनुसार हाल सडक योजनाको जिरोकिलोदेखि मेलम्चीसम्मको करीब २३ किलोमिटर सडकमध्ये १६ किलोमिटरसम्म मात्रै स्तरोन्नतिको काम भएको छ । सडक स्तरोन्नतिअन्र्तगत काभ्रेपलाञ्चोक तथा सिन्धुपाल्चोक क्षेत्रको सडकमा पर्खाल लगाउने, नाली, कल्भर्ट बनाउने काम भइरहेको महतोले बताए।

उनका अनुसार जिरोकिलोदेखि कोदारीसम्म करीब आठ किलोमिटर सडकमा चार महीनाभित्र कालोपत्रे गरिसक्ने लक्ष्य राखिएको छ । सडक योजनाअन्र्तगत सिन्धुपाल्चोकमा सडक छेउका करीब साढे दुई किलोमिटर सामुदायिक वन रहेको र उक्त क्षेत्रमा सडक बनाउने विषयमा पनि विवाद देखिएको छ । उक्त क्षेत्रमा वातावरणीय प्रभाव मूल्याङ्कन गर्नुपर्ने देखिएकाले सडक स्तरोन्नतिको काम रोकिएको इञ्जिनीयर महतोले बताए ।

जिल्ला प्रशासन कार्यालय काभ्रेपलाञ्चोकले गत मङ्सिर २६ गते पाँचखाल–मेलम्ची सडक योजनाअन्र्तगत पाँचखाल नगरपालिका तथा मण्डनदेउपुर नगरपालिका क्षेत्रमा सडक रेखाङ्कनको सीमा क्षेत्रमा पर्ने (मेलम्ची खानेपानी विकास समितिबाट अधिग्रहण भइसेकेका बाहेक)को जग्गा अधिग्रहण गर्न सार्वजनिक सूचना जारी गरिसकेको छ ।

मण्डनदेउपुर नगर प्रमुख टोकबहादुर वाइवाले जग्गा अधिग्रहणका विषयमा आफूले सहयोग गरिरहेको बताए । उनले भने “सडकका लागि थप केही जग्गा अधिग्रहण गर्नुपर्ने देखिन्छ ।” हेलम्बु राजमार्गअन्तर्गत पाँचखाल–मेलम्ची सडक पुनःनिर्माणका लागि करीब रु एक अर्ब बजेट विनियोजन भएको इञ्जिनीयर महतोले जानकारी दिए । योजनाको काम स्वछन्द–आशिष कन्ट्रक्सन कम्पनीले गरेको हो ।

इञ्जिनीयर महतोका अनुसार आगामी जेठ मसान्तभित्र योजनाको ८५ प्रतिशत कामसक्ने लक्ष्य लिइएको छ । यस राजमार्गमा हाल यात्रुबाहक सवारीसँगै दैनिक सयौँको सङ्ख्यामा टिपर गुड्ने गरेका छन् ।