दमौली । गण्डकी प्रदेशका मुख्यमन्त्री पृथ्वीसुब्बा गुरुङले भ्रष्टाचार र अनियमितताले मुलुकको विकास हुन नसकेको बताए । जिल्ला समन्वय समिति तनहुँले आज बन्दीपुर गाउँपालिका–५ मा आयोजना गरेको जिल्लास्तरीय वार्षिक समीक्षा गोष्ठीको उद्घाटन गर्दै उनले भ्रष्टाचार र अनियमितता मौलाउँदा मुलुकको विकास सोचे जस्तो हुन सकेको छ्रैन् भने ।
मुख्यमन्त्री गुरुङले दुई वर्षे योजना बाह्र/तेह्र वर्षसम्म पनि सम्पन्न हुन नसक्नु र विनियोजित बजेटको सही सदुपयोग हुन नसक्नु जस्ता कारणले मुलुकको विकास पछाडि परेको उल्लेख गर्दै “सडक खन्नका लागि मात्रै बजेट विनियोजन गर्ने होइन, पिछडिएका जनताको आर्थिकस्तर उकास्ने कार्यक्रममा समेत बजेट खर्च गर्नुपर्छ”, भने ।
प्रदेश र स्थानीय तहलाई सङ्घीय सरकारले अधिकार कम दिएको गुनासो गर्दै उनले आफूले प्रदेश र स्थानीय तहलाई बलियो बनाउनुपर्छ भनेर आवाज उठाइरहेको बताए । “बेलाबेलामा प्रधानमन्त्रीलाई यस विषयमा भन्ने गरेको छु, तर कतिपयलाई आफ्नै पार्टीका प्रधानमन्त्रीसँग किन झगडा गरेको भन्ने लागिरहेको छ”, उनले भने, “त्यो झगडा होइन अधिकार मागेको हो ।” मुख्यमन्त्री गुरुङले राजश्व उठाउने अधिकार नहुँदा प्रदेश र स्थानीय सरकार कमजोर भएको बताउँदै यसबारेमा सङ्घीय सरकारले बेलैमा सोच्नुपर्ने धारणा व्यक्त गरे ।
प्रतिनिधिसभा सदस्य केदार सिग्देलले स्थानीय तहमा बजेट कम भएको गुनासो गर्नुभन्दा पनि बजेटको सही सदुपयोग गर्नुपर्नेमा जोड दिए । प्रतिनिधिसभा सदस्य कृष्णकुमार श्रेष्ठले तनहुँलाई समृद्ध बनाउन सबै राजनीतिक दलबीच सहकार्य र एकता आवश्यक रहेको बताए । राष्ट्रियसभा सदस्य प्रकाश पन्थले जनप्रतिनिधिले निरासाजनकभन्दा पनि आशावादी भएर जनतामुखी काम गर्नुपर्ने धारणा व्यक्त गरे ।
गण्डकी प्रदेशका आन्तरिक मामिला तथा कानूनमन्त्री हरिबहादुर चुमान, प्रदेशसभा सदस्य आशा कोइराला, रामबहादुर गुरुङ, डोवाटे विक, सरिता गुरुङ, प्रमुख जिल्ला अधिकारी भरतकुमार शर्मा, भानु नगरपालिकाका प्रमुख उदयराज गौली, बन्दीपुर गाउँपालिकाका उपाध्यक्ष करुणा गुरुङलगायतले मुलुकको विकास र समृद्धिका लागि सङ्घ, प्रदेश र स्थानीय सरकारबीच समन्वय र सहकार्य हुनुपर्ने आवश्यकता औल्याए ।
