काठमाडौँ । जापानमा रहेका नेवारी समुदायको संस्था नेवा खलले नेवारी कला संस्कृति, रहन सहनको प्रवद्र्धन गर्दै जापानी संस्कृतिसँग एकाकार गर्ने उद्देश्यले प्रदर्शनीको आयोजना गरेको छ ।
मङ्गलबार टोकियोको रिङ्काई उद्यानमा जापानवासी नेवार समुदायलाई एकताबद्ध गरी सांस्कृतिक वेशभूषाको प्रदर्शनीसहित नेवारी भोज कार्यक्रम आयोजना गरिएको हो । नेपालको सांस्कृतिक पहिचानलाई जापानमा परिचित गराउन जापानभर बसोबास गर्दै आएका विभिन्न पेशामा आबद्ध नेवार समुदायको सहभागितामा कार्यक्रम गरिएको टोकियोमा कार्यरत नेपाली वकिल डा. बलराम श्रेष्ठले जानकारी दिए ।
कार्यकममा नेवारी लोक नृत्य, पोशाक, गीत–सङ्गीत, धिमे बाजा, सम्मे बजी लगायतको प्रदर्शन पनि गरिएको थियो । नेपालीको सांस्कृतिक गतिविधिको जापानीले उत्सुकतापूर्वक अवलोकन गरेको नेवा खल जापानका अध्यक्ष प्रकाशलाल श्रेष्ठले बताए।
