कर्णाली प्रदेश

चीनबाट जिल्लामा भित्रिने चिनियाँ मदिरा बरामद

सिमकोट । हुम्ला जिल्ला सिमकोट गाउँपालिकाअन्तर्गत डेहे प्रहरी चौकीबाट खटिएको प्रहरी टोलीले चीनको सीमा क्षेत्रमा पर्ने बैजिबाडा गाउँबाट झाडीमा लुकाइराखिएको ३० बोरामा ६० कार्टुन चिनियाँ मदिरा आज बरामद गरेको छ । चीनसँग जोडिएका नाकाबाट चिनियाँ मदिरा जिल्लामा भित्रिएको खबर आउन थालेपछि जिल्ला प्रहरी कार्यालय हुम्लाले चीनसँग जोडिएका नाकालाई सुरक्षामा थप कडाइ गरिएको जिल्ला प्रहरीका कार्यालयका गजेन्द्र बोगटीले बताए ।

चीनबाट जिल्लामा भित्रिने चिनियाँ मदिरामा कडाइ गरिए पनि हुम्लाका विभिन्न चोर नाकाबाट झिँनी आउने गरेको र यसलाई विस्तारै नियन्त्रणमा लिइएको प्रहरी निरीक्षक बोगटीले जानकारी दिए । बरामद गरिएको मदिरा कोलेनिका, जिल्ला प्रशासन कार्यालय र जिल्लाका सञ्चारकर्मीको रोहवरमा नष्ट गरिने बताइएको छ ।