चितवन । दूर्गम र पहाडी क्षेत्रका निरक्षर मात्र होइन, शहरका शिक्षित महिलाहरु पनि मानव बेचबिखनमा पर्ने गरेका छन् ।
वैदेशिक रोजगारीका नाममा जागिर खाँदै गरेका र शिक्षित महिलाहरुसमेत बेचबिखनमा परेका हुन् ।
महिलाहरुको पुनःस्थापनामा क्रियाशील आदर्श नारी गृहकी सलाहकार मीना खरेलका अनुसार एउटा बैंकमा तल्लो तहमा काम गर्दै गरेकी एक महिलालाई उद्धार गरिएको छ । प्रवेशिका परीक्षा उत्तीर्ण गरेर पढ्दै गरेका पनि मानव बेचबिखनमा पर्ने गरेका छन् । गृहले गत आर्थिक वर्षमा २२ जनाको उद्धार गरेको छ । जसमध्ये ११ जना चितवनका छन् ।
उनीहरु भरतपुर महानगरपालिका, कालिका नगरपालिका र माडी नगरपालिकाका हुन् । बैदेशिक रोजगारीका नाममा अधिकांशलाई फकाइफुलाई लैजाने गरेको पाइएको छ ।
सिलाइकटाइ, व्युटिपार्लर, गार्मेन्टलगायतमा रोजगारी लगाइदिने भन्दै बेचबिखनका लागि लैजाने क्रम बढेको पाइएको छ । सलाहकार खरेल भने “केहि काम नगरी बसेका र सामान्य काम गरेकाहरुलाई काम सिक्दैमा रु २० हजार, त्यसपछि अरू धेरै तलब पाउने प्रलोभनमा पारिन्छ ।”
भारतबाट युरोपसम्म जान पाउने, पासपोर्ट र नागरिकतासमेत दलालले नै बनाई दिने आश्वासन उनीहरुलाई दिने गरेका छन् ।
गृहले दिल्लीको कोठीबाटै बेचिएका महिलाहरुको पनि उद्धार गरेको छ । उद्धार गरिएकाहरु दलित, जनजाति समुदायका बढी रहेका छन् । खुल्ला नाका भएकाले सहजै भारतीय बजारहरुमा यौन धन्दाका लागि यहाँका महिलाहरु बढी बेचिने गरेका देखिएका छन् । यससँगै अंग प्रत्यारोपण, सर्कस, डान्सबार, घरेलु कामदार, बन्धक बनाएर यौन शोषण, दासका रुपमा राख्न पनि महिलाहरु बिक्री हुने गरेको बताएका छन् ।
मानव बेचबिखनमा परेका महिलाहरुको उद्धारमा क्रियाशील संस्था किङ्गडम इन्भेष्टमेन्ट (केआई) नेपालले गत आर्थिक वर्षमा उद्धार गरेकामध्ये नौ जना चितवनका छन् ।
जिल्ला संयोजक केमिका घिमिरेका अनुसार उनीहरुलाई वीरगञ्ज, सुनौली र भारतबाट उद्धार गरिएको हो । उद्धार गरिएकामा पनि भरतपुर महानगरपालिका, माडी नगरपालिका र कालिका नगरपालिकाका छन् ।
यो संस्थाले पनि भारतका कोठीहरुबाट समेत बेचबिखनमा परेकाहरुलाई उद्धार गरेको जनाएको छ । बेचबिखनमा परेकाहरु धेरै पैसा कमाउने प्रलोभनमा फस्ने गरेको घिमिरेले बताउनुभयो । धेरै कमाउने, मिठो खाने र घुम्ने प्रलोभनमा युवती र महिलाहरु बेचबिखनमा पर्ने गरेको पाइन्छ ।
माइती नेपाल चितवनका प्रमुख ईश्वर गिरी जनवरी यता उद्धार गरिएका नौ जनामध्ये पाँच जना चितवनका रहेका बताउनुहुन्छ । उनीहरुलाई ठोरी नाका, महेन्द्रनगर र भैरहवाबाट उद्धार गरिएको हो । उद्धार गरिएकामा भरतपुर महानगरको जगतपुर, ईच्छाकामना गाउँपालिकाको दारेचोक र कालिका नगरपालिकाको पदमपुरका छन् ।
वैदेशिक रोजगारीमा जाने नाममा उनीहरु बेचबिखनमा परेका हुन् । दलालहरुले विभिन्न प्रलोभनमा सहजै फकाउन सक्ने भएपछि महानगर र नगर क्षेत्रका शिक्षित महिलाहरुसमेत फस्ने गरेको गिरीको तर्क छ ।
जिल्ला प्रहरी कार्यालय चितवनले दिएको जानकारी अनुसार गत आर्थिक वर्ष २०७४/७५ मा १० वटा मानब बेचबिखनका मुद्दा दर्ता भएका छन् । प्रहरी नायब उपरीक्षक प्रभुप्रसाद ढकालले १२ जनालाई पक्राउ गरी मानब बेचबिखनको मुद्दा दर्ता गरिएको बताउनुभयो । ती मुद्दामा १३ जना फरार छन् ।
आर्थिक वर्ष २०७३÷०७४ मा जिल्लामा मानन बेचबिखनका नौ वटा मुद्दा दर्ता भएका थिए । जसमा सात जनालाई पक्राउ गरी कारवाही गरिएको थियो भने पाँच जना फरार छन् । सोही समयमा आठ जना महिलाको बिभिन्न नाकाबाट उद्धार गरिएको थियो ।
युरोपियन देशहरुमा रोजगारी लगाइदिन्छु, परिवारलाई तत्काल राहत दिलाइदिने, विवाह गरेको नाटक गर्ने र नाता गाँसेर नाका पार गराउने काम बढी हुने गरेको पाइन्छ ।
चितवन हुँदै ठोरी, वीरगञ्ज, सुनौली, कृष्णनगर, काँकडभिट्टा, विराटनगर, नेपालगञ्जलगायतका नाकाबाट भारत लगिने गरेको छ । अन्य जिल्लाबाट चितवनको बाटो प्रयोग गरेर बेचबिखनका लागि लैजाने गरेको पाइन्छ ।
भारतसँग खुल्ला सीमा भएकाले सहजै आवतजावत गर्न सकिने हुँदा दलालहरुलाई महिला बेचबिखन गर्न सहज भएको छ ।
