विराटनगर । प्रदेश नं १ का सामाजिक विकासमन्त्री जीवन घिमिरेले सामाजिक विकास मन्त्रालय स्थापना भएदेखि असार मसान्तसम्म मन्त्रालयबाट भएका प्रगति विवरण आज यहाँ पत्रकार सम्मेलनमार्फत सार्वजनिक गरेका छन् ।
गएको फागुनमा स्थापना भएको मन्त्रालयले छोटै समयमा जनहितका थुप्रै काम गरेको र यसबाट प्रदेशका जनता निकै लाभान्वित भएको मन्त्री घिमिरेले दाबी गरे । उनले आफ्ना मातहतमा रहेका क्षेत्रको सम्मुनत विकासका लागि विशेष ध्यान दिएको, सरकारी अस्पताललाई पहिलो उपचार केन्द्रका रुपमा विकास गर्ने योजनाअनुसार कार्य प्रारम्भ गरेको, बाल विवाह अन्त्यका लागि सचेतना अभियान सञ्चालन गरेको, किशोरीहरुका लागि महिनावारी स्वास्थ्य व्यवस्थापन अभियान सञ्चालन गरेको, सुनसरीको बराह क्षेत्रको चतरामा योग शिविर सञ्चालन गरेको, निजी अस्पताल तथा नर्सिङ होमहरुको नियमित नियमन गर्न कार्य प्रारम्भ गरेको, पक्षघात भएका बिरामीका लागि कोशी अञ्चल अस्पतालमा थेरापी सेवा शुरु गरेको जनाउनु भएको छ ।
उनले जारी गर्नुभएको विज्ञप्तिमा शिक्षा क्षेत्रमा सामुदायिक विद्यालयको शिक्षाको गुणस्तर सुधारलाई लक्षित गरी प्रविधि मैत्री, बालमैत्री, दण्डरहित र व्यवहार कुशल सीपमा आधारित सिकाइलाई अभियानकै रुपमा सञ्चालन गरेको, विद्यालय शिक्षा र उच्च शिक्षाको व्यवस्थापनका सम्बन्धमा थुप्रै काम गरी योजनाहरु बनाएको, कानून तर्जुमा कार्य जारी राखी मन्त्रालयसँग सम्बन्धित चार वटा विधेयक तर्जुमा गरी प्रदेश सभामा पेश गर्ने तयारी गरेको कुरा उल्लेख छ ।
