काठमाडौँ । गृहमन्त्री रामबहादुर थापाले आजको २१ औँ शताब्दीमा समेत जातीय आधारमा विभेद गर्ने जो कोहीलाई कडा कारवाही गरिने प्रतिबद्धता व्यक्त गरेका छन् ।
जातीय भेदभाव तथा छुवाछूत उन्मूलन १२ औँ राष्ट्रिय दिवसका अवसरमा राष्ट्रिय दलित आयोग, उपेक्षित, उत्पीडित र दलितवर्ग उत्थान विकास समिति, दलित महिला उत्थान सङ्घ (एड्वान), जागरण मिडिया सेन्टरलगायत संघसंस्थाद्वारा यहाँ आज आयोजित, ‘जातीय भेदभाव तथा छुवाछूतको वर्तमान अवस्था र समाधानको उपाय’ विषयको अन्तक्र्रियामा मन्त्री थापाले भने, “जातीय भेदभाव तथा छुवाछूत अन्त्य गर्नेबारे सरकारले देशव्यापी अभियान नै चलाउँदै छ, जातीय आधारमा छुवाछूत वा विभेद भएको बारे मलाई जानकारी दिनुहोस्, म सरकारको तर्फबाट हदैसम्मको कारवाही गर्नेछु ।”
आर्थिक, सामाजिक र सांस्कृतिक रुपमा शदियौँदेखि पछाडि पारिएको दलित समुदायको समस्या समाधान गर्दै सामाजिक न्यायमा आधारित समतामूलक समाज निर्माण गर्ने वर्तमान सरकारको योजना रहेको जानकारी उनले भने ।
नेपाल कम्युनिष्ट पार्टीका नेता तिलक परियारले अहिले पनि अन्तरजातीय विवाह गरेको वा पानी छोएको निहुँमा दलित युवाको हत्या गरिएको र दलित समुदाय गाउँबाटै विस्थापित हुनुपरेकामा गुनासो गरे ।
नेकपाका अर्का नेता जीतु गौतमले जनसंख्याका आधारमा राज्यका हरेक संरचनामा दलित समुदायको सहभागिता हुनुपर्ने माग गरे । एड्वानका अध्यक्ष पम्फा परियारले समग्रमा दलित समुदायभित्र पनि दलित महिला सबैभन्दा बढी उत्पीडनमा परेकाले उनीहरुलाई राज्यले विशेष व्यवस्था गर्नुपर्नेमा जोड दिए ।
