विराटनगर । नेपाल प्रेस युनियन, मोरङले हरेक वर्ष प्रदान गर्दै आएको रमाप्रसाद–मायादेवी रिजाल पत्रकारिता पुरस्कार यस वर्ष पत्रकार कुमोद अधिकारीलाई प्रदान गर्ने भएको छ ।
प्रेस युनियन, मोरङको सोमबार बसेको बैठकले पत्रकारितामा सक्रिय अधिकारीलाई रु ११ हजार १११ नगदसहितको विसं २०७५ कालागि सो पुरस्कार र सम्मानपत्र प्रदान गर्ने निर्णय गरेको सो युनियनका अध्यक्ष मीनकुमार नवोदितले जानकारी गराए ।
पत्रकार महासंघ मोरङका उपाध्यक्षसमेत रहनुभएका अधिकारी रेडियो नेपालमा कार्यरत छन् । नेपालको प्रजातान्त्रिक आन्दोलनमा लामो संघर्ष गरेका रमाप्रसाद रिजाल दम्पतीका नाममा युनियनले पुरस्कार स्थापना गरेको हो ।
आफ्ना बाबुआमाको नाममा हरेक वर्ष पुरस्कार प्रदान गर्ने गरी छोरा सुभाष रिजालले रु दुई लाखको अयक्षकोष खडा गरेका छन् ।
