काठमाडौँ । पूर्व जानकारी बिना नेपाल संस्कृत विश्वविद्यालयले उत्तरमध्यमा (प्रविणता प्रमाणपत्र तह) र भाषा प्रशिक्षण कक्षाको भर्ना बन्द गरेपछि प्राध्यापक एवं विद्यार्थीले यसलाई तत्काल सञ्चालनको माग गरेका छन् ।
प्रत्येक वर्ष वैशाख पहिलो साता साधारण विद्यालयबाट माध्यमिक शिक्षा परीक्षा (एसइई) दिएर बसेका विद्यार्थीका लागि संस्कृत भाषा प्रशिक्षण शुरु हुन्थ्यो । यस वर्ष पूर्व जानकारी बिना भाषा प्रशिक्षण भएन । उत्तरमध्यमाको भर्ना पनि नखुलेपछि पुनःसञ्चालनको माग भएको हो ।
त्रिभुवन विश्वविद्यालयबाट प्रवीणता प्रमाणपत्र तह हटे पनि संस्कृत विश्वविद्यालयबाट उत्तरमध्यमा तह हटेको थिएन । संस्कृतमा दश जोड दुईको पाठ्यक्रम तयार नभएको भन्दै विश्वविद्यालयले उत्तरमध्यमा तहको पठनपाठन गर्दै आएको थियो ।
वाल्मीकि विद्यापीठका विभागीय प्रमुखको आजको भेलाले तत्काल उत्तरमध्यमा र भाषा प्रशिक्षण कक्षा सञ्चालन गर्न विश्वविद्यालय प्रशासनसमक्ष माग गरेको छ । संस्कृतमा विद्यार्थीको स्रोत नै उत्तरमध्यमा भएकाले यो तहको पठनपाठन बन्द गर्न नहुने प्राध्यापकको माग छ ।
गृहकार्य बिना दुवै तहको कक्षा स्थगन गरिएकामा प्राध्यापकले नेसंवि योजना, अवधारणा निर्माण समिति नै गठन गरेर संस्कृत शिक्षाको दीर्घकालीन योजना निर्माणको अभियान शुरु गरेका छन् ।
पाँच सदस्यीय समितिको संयोजकमा प्रा डा भोजराज पन्त, सदस्यहरुमा प्रा डा जीवन अधिकारी, प्रा डा मोहनप्रसाद पोखरेल, सप्रा डा माधवप्रसाद पाण्डेय र सदस्य सचिवमा उप प्रा. डा प्रेमराज न्यौपाने छन् ।
विश्वविद्यालयको विकासका लागि दश वर्षे योजना निर्माण गर्न समिति गठन गरिएको हो । संस्कृत शिक्षालाई नयाँ ढङ्गले पठनपाठन गराउन नीति निर्माण गरिने सदस्य सचिव न्यौपानेले जानकारी दिए ।
