काठमाडौँ । बूढानीलकण्ठ नगरपालिका–५ डाँडागाउँमा सञ्चालित अनाथ तथा असहाय बाल सुधारमा रहेका बालबालिकालाई पोशाक र अध्ययन खर्चको समस्या परेको छ ।
आमाबाबु नभएका टुहुरा बालबालिकालाई पालनपोषण गर्दै आएको अनाथ तथा असहाय सुधार समाजमा रहेका ३७ बालबालिकालाई अध्ययन खर्च र पोशाकको समस्या परेको हो ।
विसं २०५९ मा काठमाडौँको डल्लुबाट एकजना बालबालिकाबाट शुरु भएको अनाथ तथा असाहय बाल सुधार समाजमा अहिले १३ महिला र २४ पुरुष रहेका छन् । जसमध्ये १३ जना बालबालिकाले बालविकास समाज बूढानीलकण्ठमा निःशुल्क अध्ययन गरेको र बाँकी २४ जनालाई पञ्चकन्या माविमा पैसा तिरेर पठनपाठन गराउँदै आएको समाजका सञ्चालक रमेशदेव सुनारले जानकारी दिए । “अनाथ बालबालिकालाई पैसा तिरेर पढाउनु पर्दा समस्या परको छ,” उनले भने ।
सुनारले आफू सानै उमेरमा अनाथ भएको कारण अनाथ बालबालिकाप्रति केही गर्नुपर्ने मान्यताका साथ १५ वर्षअघि अनाथ, असहाय बालसुधार समाज स्थापना गर्नुभएको थियो ।
समाजमा नुवाकोट, धादिङ, रसुवा, कास्की, सिन्धुपाल्चोक, कालिकोट, बाजुरा, मुगु, सुर्खेतलगायतका १४ जिल्लाका चारदेखि १८ वर्षमुनिका अनाथ बालबालिका रहेका छन् ।
अनाथ बालबालिकालाई दुई छाक खाना खुवाउन काठमाडौँ भ्याली विद्यालय चक्रपथले प्रतिमहिना १२ बोरा चामल, चार बोरा दाल उपलब्ध गराएको र तरकारीका लागि मसाजसेवी कल्पना थापाले सहयोग गरेको सञ्चालक सुनार बताउछन् ।
अनाथ, असहाय तथा वृद्धले गरेको संघर्ष देखेर समाजसेवी तथा कलाकार नयन डिसीले आफ्नो जन्मदिनका अवसरमा आज अनाथ, असाहय बाल सुधार समाज बूढानीलकण्ठ र मानसेवा आश्रम सामाखुशीमा रहेका १०० भन्दा बढी वृद्ध तथा बालबालिकालाई निःशुल्क भोजन गराएका छन् ।
विसं २०७२ मा सामाखुशीमा स्थापना भएको मानव सेवा आश्रममा ६७ बेसहारा वृद्धवृद्धा रहेका छन् । खुला सडकलाई आफ्नो घर बनाएर बसेका मानिसलाई विभिन्न क्षेत्रबाट ल्याएर आश्रममा राखिएको हो ।
मुठी दानबाट सञ्चालनमा ल्याइएको आश्रम नेपाल र नेपालीबाट सञ्चालन भएको मानव सेवा आश्रम काठमाडौँका संयोजक सुमन बतौलाले बताउनुभयो । आश्रममा हाल मकवानपुरमा दुई, काठमाडौँमा दुई, चितवन, ललितपुर, गोरखा, लमजुङ, पर्सा, बाग्लुङ र कास्कीमा सञ्चालनमा रहेको छ ।
काठमाडौँ महानगरपालिका–ं२६ मा सञ्चालनमा रहेको मानव सेवा आश्रम रहेको घरको भाडा भने महानगरपालिकाले ब्यहोर्दै आएको वडाध्यक्ष ख्याम तिवारीले जानकारी दिए ।
