काठमाडौँ । अन्नपूर्ण भूतपूर्व विद्यार्थी समाज (अभूविस), काठमाडौँ र अन्नपूर्ण उच्च शैक्षिक केन्द्र सहयोग समितिले अन्नपूर्ण उच्च मावि, दिल्पा, भोजपुरका संस्थापक सदस्य कृष्णभक्त अधिकारीलाई बुधबार यहाँ सम्मान गरेको छ ।
दिल्पा, भोजपुरका शिक्षासेवी अधिकारीले २००८ सालमा दिल्पा बाहुनगाउँमा शिशुकक्षा सञ्चालनको शुरुवात गरी शिक्षक कुबेर चापागाँईसमेत भएर अध्यापन शुरु गरेका थिए भने २०१० मा हालको अन्नपूर्ण उमाविको संस्थापक सदस्यका रुपमा रहेका थिए ।
गोरखा मिलेनियम सहकारी संस्था, मीनभवनमा भएको कार्यक्रमका समितिका सदस्य महेन्द्रकुमार वान्तवा र विद्यालयका पूर्व प्रधानध्यापक चक्र रेग्मीले सम्मानपत्रका साथ दोसल्ला ओढाई ९३ वर्षीय अधिकारीलाई सम्मान गरेका थिए ।
कार्यक्रममा विद्यालयका पूर्वप्रधानाध्यापक इन्द्रसुर राईले शिक्षाविहीन त्यस समयमा विद्यालय स्थापना गरी त्यस क्षेत्रमै ज्ञानको ज्योति फैलाउनु ठूलो कुरा भएको बताए ।
हाल चप्रमारी, झापामा बसोवास गरिरहेका सम्मानित अधिकारीले दिङ्लामा षडाननद्वारा स्थापित नेपालकै पुरानो संस्कृत पाठशालाको प्रेरणाले नै आफूहरुले पनि गाउँमा पठनपाठन शुरु गरेको बताए । उनले शिक्षा भनेको रुख रोप्नुजस्तै हो, जसले भविष्यमा ज्ञानरुपी फल दिन्छ भने ।
हाल टेम्केमैयूँ गाउँपालिकामा रहेको उक्त विद्यालयमा हाल उच्च माविसम्मको अध्ययन अध्यापन हुने गरेको छ ।
