काठमाडौं । प्रधानमन्त्री केपी शर्मा ओलीले आफ्नो भारत भ्रमण नेपालको हितमा भएको बताएका छन् । सुनचाँदी व्यावशायी महासँघको पाँचौ साधारणसभालाई आज सम्बोधन गर्दै प्रधानमन्त्री ओलीले सो कुरा बताएका छन् ।
प्रधानमन्त्री ओलीले नेपालको हितको पक्षमा छिमेकीसँग कुरा गर्न मात्र होइन त्यसलाई सदर गराउन पनि सकिने बताएका छन् । “देशको चासोका बिषय छिमेकीसाग छलफल गरेर सदर गराउन सकिन्छ” प्रधानमन्त्री ओलीले भने ।
प्रधानमन्त्री ओलीले सरकार रोजगारी सृजना गर्ने, उत्पादन बढाउने,जनताको आर्थिक स्तर उकास्ने कार्यमा लागेको बताएका छन् ।
प्रधानमन्त्री ओलीले सरकार व्यावशायीको सुरक्षामा गम्भिर रहेको बताएका छन् । उनले व्यावशायी मात्र हैन हरेक नागरिकले सुरक्षाको चिन्ता लिनु नपर्ने बताए । “नेपालको सिमा भित्र हुने कोही कसैले पनि अब सुरक्षाको चिन्ता गर्नु पर्दैन” प्रधानमन्त्री ओलीले भने “सरकार गैह्र कानुनी, हिंसात्मक र अपराधपूर्ण क्रियाकलापलाई सहदैन ।”
प्रधानमन्त्री ओलीले अबको नेपालमा अबैधानिक काम,तस्करी जस्ता कुराहरु बर्जित हुने बताएका छन् । “तस्करीको कुरा गर्दा सुनको पनि नाम आंउछ” प्रधानमन्त्री ओलीले भने “तर अब जे गर्नुछ कानुनी तवरले गर्नुहोस । कानुनी अफ्ठ्यारा छन् भने त्यसलाई फुकाउने काम सरकारले गर्छ ।”
प्रधानमन्त्री ओलीले व्याववशायीहरुलाई हरेक व्यावशाय नक्कली होइन सक्कली ढंगले गर्न आग्रह गरे । नाफामुखी मात्र भन्दा पनि हरेक उपभोक्ताको हितलाई ध्यान दिएर काम गर्न प्रधानमन्त्री ओलीले आग्रह गरेका छन् ।
