दार्चुला । सनराइज बौक लिमिटेड शाखा दार्चुलाले आफ्नो दशौँ वार्षिकोत्सवको अवसरमा जिल्लाका दुईजना टुहुरा बालिकालाई आज छात्रवृत्ति प्रदान गरेको छ ।
ब्यास गाउँपालिका वडा नं २ दुम्लिङ गाउँको सर्वहित आधारभूत विद्यालयमा अध्ययनरत छात्रा अञ्जना बुढाथोकी र करिष्मा जोहारीलाई छात्रवृत्ति प्रदान गरिएको हो ।
एघार वर्षीय अञ्जना बुढाथोकी कक्षा ५ मा अध्ययनरत छात्रा हुन् भने, सात वर्षीय करिष्मा जोहारी कक्षा ३ मा अध्ययनरत छात्रा हुन् । उनीहरु चार÷पाँच वर्षदेखि टुहुरो जीवन जिउँदै आइरहेको स्थानीय तथा सर्वहित आधारभूत विद्यालयका विद्यालय व्यवस्थापन समिति अध्यक्ष सरस्वती धामीले जानकारी दिए ।
उनीहरुको पढाइका लागि बैँकले वार्षिक १७ हजारका दरले रु ३४ हजार विद्यालयको खातामा जम्मा गरिदिएको छ । सनराइज बैँक दार्चुला शाखाका प्रबन्धक राकेश बुढाथोकीले विद्यालय व्यवस्थापन समितिका अध्यक्ष धामीलाई बैँक र विद्यालयबीच भएको सम्झौताको पत्र हस्तान्तरण गर्दै छात्रवृत्ति प्रदान गरेका छन् ।
उनीहरुले कक्षामा सधैँ सफलता प्राप्त गरेमा कक्षा १२ सम्म पढ्नका लागि बैँकले छात्रवृत्ति प्रदान गरिरहने छ । बैँकले हालसम्म आफ्नो १०औँ वार्षिकोत्सवका अवसरमा विभिन्न जिल्लाका १० जनालाई छात्रवृत्ति प्रदान गरिसकेको छ ।
