भोजपुर । भोजपुरका द्वन्द्वपीडितसँग एकदिने अन्तरक्रिया सम्पन्न भएको छ । स्थानीय शान्ति समिति, भोजपुरले सोमबार आयोजना गरेको नगरस्तरीय द्वन्द्वपीडितसँग एकदिने छलफल तथा अन्तरक्रियामा सहभागीले द्वन्द्वपीडितको परिवारलाई नेपाल सरकारले चाँडोभन्दा चाँडो राहत उपलब्ध गराउनु पर्ने माग राखेका छन् ।
द्वन्द्वका क्रममा अंगभंग भएका पीडित परिवारका छोराछोरीलाई समेत सरकारले निःशुल्क पढाउने वातावरण बनाउन स्थानिय शान्ति समितिमार्फत उनीहरुले आग्रह गरेका हुन् ।
अन्तरक्रियामा भोजपुर नगरपालिकाका प्रमुख कैलाशकुमार आलेले द्वन्द्व पीडितलाई स्थानीय सरकारले सक्दो सहयोग गर्ने भन्दै द्वन्द्वपीडितको समूह बनाएर आर्थिकस्तर वृद्धिका निम्ति सीप विकासको योजना पेश गर्ने बताए ।
हाल भोजपुरमा १३० मृतक, नौजना बेपत्ता, २२ जना अपहरण र २९६ परिवार विस्थापित रहेको स्थानीय शान्ति समितिका सचिव टेकबहादुर श्रेष्ठले जानकारी दिए ।
