तुलसीपुर, दाङ । लमही नगरपालिका वडा नं ५ टिकुलीगढका अम्मरबहादुर तामाङ व्यावसायिक माछापालन गरेर एक सफल व्यावसायिक माछापालक बन्नुनेका छन् ।
उनले हाल आठ बिघा जग्गामा आठ वटा पोखरी निर्माण गरी माछापालन गरिरहेका छन् । अहिले बिहानैदेखि उनको घरमा माछा लिन आउनेको भीड लाग्ने गरेको देखिन्छ ।
विगत आठ वर्षदेखि व्यावसायिक रुपमा माछापालन गर्दै आएका तामाङ अहिले माछा र माछाको भुरा उत्पादन गरेर वार्षिक रु ४० लाख आम्दानी गर्छन् । तामाङले अहिले स्थानीय सातजना व्यक्तिलाई रोजगारीसमेत दिएका छन् ।
माछापालनबाट अहिले वार्षिक रुपमा रु ४० लाख आम्दानी भए पनि सबै खर्च कटाएर वार्षिक रु २० लाख मात्र बचत हुने गरेको तामाङले बताए ।
“घरमा माछा लिन आएकाले पनि कसरी, कहिलेदेखि यसो गरे भन्दै सोध्छन्, यहाँ आएका जोसुकैले पनि एक पटक पोखरी खन्ने सपना देखेर फर्कन्छन्,” उनले भने ।
शुरुमा धान, गहुँ राम्रोसँग उत्पादन हुने जग्गामा माछापालनका लागि पोखरी निर्माण गर्दा उनलाई गाह्रो भने नभएको होइन । गाउँ, समाज र घर परिवारबाट खेतीयोग्य जमिनलाई खनेर खाल्टो पार्दा बौलाउन थालेछ भन्नेहरु अहिले आफ्नो प्रशंसक भएको उनको भनाइ छ ।
करिब आठ बिघा क्षेत्रफलमा फैलिएको पोखरीमा ग्रास, कमन, सिल्भर, विग हेड, रहु र नैनी जातका माछा पालिएका छन् ।
यो वर्ष मात्रै २०० क्विन्टल भन्दा बढी माछा बिक्री भएको तामाङले बताए । त्यहाँ उत्पादन भएका माछा जिल्लाका विभिन्न बजारमा बिक्रीका लागि लैजाने गरिन्छ । प्रतिकेजी रु २२० देखि २५० सम्मका दरले माछा बिक्री हुने गरेको उनी बताउछन् ।
शुरुका दिनमा माछा बिक्री गर्न छिटुवामा राखेर स्थानीय बजारमा लैजानुपथ्र्यो उनलाई । तर अहिले टाढा टाढाबाट घरमै माछा किन्न आउनेको भीड लाग्ने गर्छ ।
यस व्यवसायबाट आफू अत्यन्तै सन्तुष्ट रहेको बताउने उनले आम्दानी पनि सोचेअनुसार गर्न सकिने हुँदा यस्ता आयआर्जनका व्यवसायमा लाग्न बेरोजगारलाई सुझावसमेत दिए ।
