बैतडी । बैतडीको दशरथचन्द नगरपालिकामा रहेको प्रसिद्ध तीर्थस्थल ईश्वरीगंगा धाममा कुम्भ मेला लाग्ने भएको छ ।
प्रत्येक १२ वर्षमा लाग्ने कुम्भमेला महाशिवरात्रिका अवसरमा आगामी फागुन १ गतेदेखि लाग्ने ईश्वर रामनाम समिति, ईश्वरीगंगा धामले जनाएको छ ।
फागुन १ गतेदेखि शुरु हुने कुम्भमेलाको तयारी तीव्र पारिएको कुम्भमेला व्यवस्थापन समितिका अध्यक्ष कर्णबहादुर चन्दले जानकारी दिए । मेलास्थल ईश्वरीगंगाधाममा कुम्भमेलाको तयारी भइरहेको छ । फागुन १ गते रुद्राभिषेक गरी फागुन ३ गतेदेखि ६ गतेसम्म महारुद्री यज्ञको आयोजना गरिएको अध्यक्ष चन्दले जानकारी दिए ।
विसं २०४० देखि सञ्चालन हुँदै आएको कुम्भमेला चौथोपटक शुरु हुन लागेको हो । ईश्वरीगंगाधामको महत्वका बारेमा सबैलाई बुझाउनका लागि कुम्भमेलाको आयोजना गरिएको आयोजकले जनाएका छन् ।
ईश्वरी गंगाधामको महिमाका बारेमा सबैलाई जानकारी गराउन ४८ वर्ष अघिदेखि कुम्भमेलाको शुरुवात गरिएको हो, उनले भने, “ईश्वरी गंगाधाममा लाग्ने कुम्भमेलाको भारतको हरिद्वारमा लाग्ने कुम्भमेला जत्तिकै महत्व रहेको छ ।”
ईश्वरी गंगाधामको दर्शन गरेमा मनोकामना पूर्ण हुने जनविश्वास रहिआएको छ । मेलामा सहभागिताका लागिसमेत समितिले सबै भक्तजनमा अनुरोध गरेको छ । जगन्नाथको बास रहेको पवित्र तीर्थस्थलका रुपमा रहेको ईश्वरी गंगाधामको प्रचारप्रसार गर्नसके यसको महत्व अझै बढ्न सक्ने स्थानीय संस्कृतिका जानकारले बताएका छन् ।
महाशिवरात्रिका अवसरमा लाग्ने उक्त चौथो कुम्भमेलाको तयारी तीव्र पारिएको छ । बैतडीमा थुप्रै धार्मिक सम्पदा रहेका भए पनि तिनीहरुको प्रचारप्रसार हुन नसक्दा ओझेलमा पर्दै गएका छन् ।
