काठमाण्डौ । नेपाली काँग्रेसका नेता प्रकाशमान सिंहले अनुशासन कारबाहीको धम्की नदिन पार्टी सभापति शेरबहादुर देउवालाई चेतावनी दिएका छन् । केन्द्रीय कार्यसमितिको बैठकमा सिंहले देउवाको चर्को आलोचना गरेका थिए ।
प्रधानमन्त्री निवास बालुवाटारमा शुक्रबार बसेको बैठकमा सिंहले देउवामाथि पार्टीमा मनपरी गरेको र २–४ जना नेतालाई लिएर हिँडेको आरोप लगाए । सुजाता कोइरालाबाहेक अरुलाई समानुपातिकमा नदोहोर्याउने केन्द्रीय कार्यसमितिको निर्णय भएपछि त्यसलाई उल्लंघन गरेको उनको आरोप छ ।
उनले देउवालाई आफू गल्ती गर्ने अनि अरुलाई अनुशासनको कारबाहीको धम्की दिने भनेका छन् । ‘पार्टी बैठकमा, बाहिर कस्तो बोल्यो भनेर अनुशासनको कारबाहीको डर धम्की दिने काम नगर्नुहोला’, उनले भनेका छन्, ‘हामी पनि पञ्चायती व्यवस्थाविरुद्ध लडेका हौं । तपाईदेखि डराउने कुनै छैन ।’
अनुशासनको कारबाहीको धम्की दिँदैमा उसैको आवाज बन्द नहुने भन्दै उनले देखेको कुरा बोल्ने बताए ।
नेता शेखर कोइरालाले संसदीय समितिमा नबस्ने घोषणा गरिसकेका छन् । रामचन्द्र पौडेल पक्षीय नेताहरुले विधान विपरित भएको भन्दै संसदीय समिति भंग गर्न माग गरेका छन् ।
शुक्रबारको बैठकमा बलबहादुर केसी, बालकृष्ण खाँडल बद्री पाण्डे लगायतले बोलेका छन् । बैठक अपराहृन ४ बजे बस्ने गरी स्थगित भएको छ ।
नेता सिंहले हिजोको बैठकमा रामचन्द्र पौडेललाई अझै अगाडि बढेर विरोध गर्न र आफूहरु साथमा भएको बताएका थिए । यतिबेला काँग्रेस नेताहरु देउवाको खुलेरै विरोधमा लागेका छन् ।
