काठमाण्डौ । नेपाली काँग्रेसका वरिष्ठ नेताहरुले प्रधानमन्त्री एवं पार्टी सभापति शेरबहादुर देउवासँग भेटवार्ता गरेका छन् ।
सोमबार बिहान बालुवाटार पुगेका काँग्रेका महामन्त्री सशांक कोइराला र बरिष्ठ नेता रामचन्द्र पौडेलले सभापति देउवालाई पार्टीको केन्द्रीय समिति बैठक बोलाउन माग गरेका छन् । भेटमा कृष्ण सिटौला र विमलेन्द्र निधि समेत उपस्थित थिए ।
उनीहरुले पार्टी केन्द्रीय समिति बैठक तत्काल बोलाउन आग्रह गर्दै विधि र विधान विपरित गठन भएका संसदीय समिति र कार्यसम्पादन समिति विघटन गर्न देउवालाई भनेका छन् ।
पौडेलले पार्टी अहिले संकटमा भएको बताउँदै करेक्सन गरेर नवजीवन दिन सभापतिलाई आग्रह गरे ।
बैठकमा आफूले भने पार्टी केन्द्रीय कार्यसमितिको बैठक तत्काल बोलाउन माग गरेको नेता पौडेलले बताए । ‘पार्टी सभापतिजीसँग कुरा भएको छ’, नेता पौडेलले भने, ‘मैले विधान विपरीत भएकाले संसदीय बोर्ड र कार्यसम्पादन समिति दुवै खारेज गर्न माग पनि गरेको छु ।’
जवाफमा देउवाले सल्लाह गरेर बैठक बोलाउने बताउँदै पार्टीलाई सुदृढ गर्दै अघि बढाउनुको विकल्प नभएको बताए ।
यस अघि आइतबार नेपाली काँग्रेसका नेता रामचन्द्र पौडेल निकट केन्द्रीय सदस्यहरुको छुट्टै बैठक बसेको थियो । उनीहरुको भेलाले प्रतिनिधि र प्रदेशसभा निर्वाचन समीक्षाका लागि तत्काल केन्द्रीय समिति बैठक बोलाउन सभापति देउवालाई आग्रह गर्दै भेटेर कुरा गर्ने जिम्मा पौडेललाई दिएको थियो ।
पौडेल पक्षीय युवा केन्द्रीय सदस्यहरुको सक्रियतामा आइतबार राजधानीमा भएको भेलाले सभापति देउवाले बैठक बोलाउन विलम्ब गरेर हस्ताक्षर अभियान चलाउने निष्कर्ष समेत निकालेको स्रोतले बतायो । उनीहरुले राष्ट्रियसभा निर्वाचनमा उम्मेदवार टुंगो केन्द्रीय समितिबाटै लगाउनुपर्ने माग गरेका थिए ।
