अर्घाखाँची । पाणिनी गाउँपालिकाको पणेना सिम्ले गाउँका बासिन्दा सुन्तला खेतीबाट आत्मनिर्भर बन्दै गएको छ ।
सिम्लेमा अहिले झण्डै ७० कृषक व्यावसायिक सुन्तला खेतीमा लागेका छन् भने पणेनामा २०० घरधुरी अहिले सुन्तला खेतीबाट रु ५० हजारदेखि रु १२ लाखसम्म आम्दानी गरिरहेका छन् ।
यहाँका युवा वैदेशिक रोजगारीबाट फर्किएर व्यावसायिक सुन्तला खेतीमा लागेका छन् । भारतीय सेनाको जागिर छाडेर फर्किएका पणेनाका ७३ वर्षीय हुमनाथ पौडेल अहिले अर्घाखाँचीकै सफल कृषक बनेका छन् ।
“सुन्तला खेतीबाट वार्षिक रु ६ लाखभन्दा बढी आम्दानी हुने गरेको छ,” उनले भने । पौडेलको बगैँचामा अहिले ६०० भन्दा बढी सुन्तलाका रुख रहेका छन् । उनले बारी, खेत, खर्कमा सुन्तला खेती गरेका छन् ।
पणेना र पोखराथोकमा सुन्तला खेती फष्टाउँदै गएको छ । व्यावसायिक सुन्तला खेतीमा लागेका सिम्लेका रेवतीराज पौडेलको बगैँचामा झण्डै ४५० सुन्तलाका रूख रहेका छन् । उनले वार्षिक रु तीन लाखदेखि रु पाँच लाखसम्म आम्दानी गर्छन् ।
“सुन्तला बिक्रीका लागि कुनै समस्या छैन,” उनले भने । यहाँ उत्पादन भएको सुन्तला प्रतिकिलो रु ७५ देखि रु ९० सम्ममा बिक्री भइरहेको छ । यस वर्ष रु चार लाख आम्दानी हुने उहाँको विश्वास छ ।
सुन्तला बिक्रीबाट मात्र हैन यहाँका किसानले सुन्तलाको नर्सरी राखी बिरुवा बेचेर मनग्य आम्दानी गर्दैआएका छन् । यहाँका किसानले सुन्तला, कागती, जुनारलगायत बिरुबा बिक्री गर्दैआएका छन् ।
