राजनीति

लेखेर राख्नुस्, वामपन्थीले ५० वर्ष त के पाँच वर्ष पनि शासन चलाउन सक्दैनः नेता महत

प्रकाश शरण महत

काठमाण्डौ । नेपाली कांग्रेसका नेता डा. प्रकाशशरण महतले राष्ट्रपति विद्यादेवी भण्डारीले सरकारले प्रस्तुत गरेको राष्ट्रिय सभासम्बन्धी अध्यादेश तत्काल स्वीकृत गर्नुपर्ने बताएका छन् । उक्त अध्यादेश तत्काल स्विकृत नगरे मुलुकमा संवैधानिक जटिलता उत्पन्न हुने भन्दै उनले चिन्ता व्यक्त गरे ।

बिहीबार राजधानीमा भएको एक कार्यक्रममा नेता महतले निर्वाचन आयोगले मत गणना गर्न सजिलो हुन्छ भनेर बुहमतीय संक्रमणीय व्यवस्थाको कुरा उठाएकोप्रति टिप्पणी गर्दै भने , ‘कसैको सजिलोको लागि बहुमतीय संक्रमणीय पद्धती हुँदैन, संविधानमा कहाँ लेखेको छ त ? अहिले बहुमत ल्याएकोले एमालेले अहंकार देखायो, बरु माओवादी केन्द्रका अध्यक्ष प्रचण्डजीले सहमति खोज्ने कुरा गर्नुभएको छ, तर एमाले अध्यक्ष केपी ओलीजीले त हामीले जे चाहन्छौं अब त्यही हुन्छ भन्दै हुनुहुन्छ, यो अहंकार हो ।’

स्थानीय तहको परिणाम आइसकेपछि कांग्रेसले एकल संक्रमणीय व्यवस्थाको गर्यो भनेर आरोप लगाउनु नै गलत भएको उनको तर्क थियो । उनले थपे, ‘अहिले हाम्रो ठाउँमा एमाले–माओवादी केन्द्र हुन्थे भने राष्ट्रपतिले किन अध्यादेश स्वीकृत नगरेको भनेर नारा र जुलुस निस्किन्थ्यो ।’

महतले हिजो सरकारले अध्यादेश पेश गर्दा ताका दलहरुवीच सहमति खोज्नुहोस् भनेर किन नभनेको भन्दै प्रश्न समेत उठाए । उनले भने, ‘राष्ट्रपतिजस्तो व्यक्ति पार्टीप्रति झुकाव जोडिएर बस्नुहुँदैन, उहाँले अध्यादेश रोक्न मिल्दैन, हामी त भन्दैछौं कि राष्ट्रपति विवादमा आउनुहुँदैन्, उहाँले तत्काल विद्येयक स्विकृत गर्नुपर्छ, हामी बडो विनम्रसँग अनुरोध गर्दैछौं ।’

उनले आफूहरुलाई सरकारमा बसिरहने रहर नै नभएको जिकिर गरे । उनले भने, ‘राष्ट्रिय सभाको निर्वाचन सम्पन्न भएपछि हामी सरकार छाड्छौं, संविधानलाई लत्याएर देश चल्छ ?’

उनले राष्ट्रपतिले जित उक्त अध्यादेश रोक्यो उति नै मुलुकमा संवैधानिक जटिलता उत्पन्न हुने बताए । महतले थपे, ‘यो अध्यादेश लैजाँदै गर्दा माओवादी केन्द्र जो अहिलेपनि सरकारमै छ, उहाँहरुको असहमति थिएन्, यसबारेमा माओवादी केन्द्रको नेतृत्वले स्पष्ट दृष्टिकोण दिनुपर्छ ।’

उनले वाम गठबन्धनले ५ वर्ष होईन ५० वर्ष शासन गर्छु भनेको उल्लेख गर्दै भने, ‘सक्नेसम्म चलाए हुन्छ, लेखेर राख्नुस्, उहाँहरुले ५० वर्ष त के ? पाँच वर्षपनि चलाउन सक्दैनन्, कांग्रेस कुनै दलभन्दा कमजोर छैन ।’

पार्टी सभापतिलाई हटाउँछु भनेर केही युवा नेताहरुले अभिव्यक्ति दिएका छन् नि भनेर पत्रकारले सोधेको एक प्रश्नमा उनले थपे, ‘कसैले टिप्पणी गर्दै हिँडेर हुन्छ त ? सस्तो लोकप्रियताको पछि लाग्नुहुँदैन्, पार्टीका बारेमा कुरा राख्ने आफ्नै फोरम छ, हामी कमजोर छैनौं, अब पार्टीलाई आधुनिक शैलीमा अघि बढाउनुपर्छ, यसबारेमा केन्द्रिय कार्य समितिमा बृहत्त छलफल हुन्छ ।’

उनले पार्टी सभापतिको विकल्प खोज्छौं भनेर हिँड्नु उत्ताउलो टिप्पणी भएको स्पष्ट पारे । उनले भने, ‘जसले जे भनेपनि अब आधारसहित प्रस्तुत हुनुपर्छ, एक अर्कालाई दोषारोपण गरेर हुँदैन्, तर्कको वजन हेरेर विश्लेषण हुन्छ, सामूहिक रुपमा छलफल गर्नुपर्छ ।’