काठमाडौँ । नेपाली काँग्रेसले निर्वाचन प्रभावित गर्ने मनसायले भएका बम आतंकप्रति भत्र्सना गरेको छ ।
काँग्रेसका मुख्यसचिव कृष्णप्रसाद पौडेलले आज प्रेस विज्ञप्ति जारी गरी लोकतन्त्रलाई नै समाप्त पार्ने ढंगले सुनियोजित षडयन्त्रबाट भएका यस्ता क्रियाकलापप्रति कतिपनि विचलित नहुन आम मतदातालाई अपिल गरेका छन् ।
उनले शान्तिपूर्ण एवं निर्वाधरुपमा निर्वाचनमा सहभागी हुन पाउने नागरिकको नैसर्गिक अधिकारको विरोध गर्ने र लोकतान्त्रिक संस्कारको उपहास गर्ने आपराधिक घटनाको मुकाविला गर्न काँग्रेस तयार रहेको उल्लेख गरेका छन् ।
मुख्यसचिव पौडेलले आपराधिक घटना नियन्त्रण गरी शान्ति सुरक्षाको प्रत्याभूति दिलाउन तथा त्यस्ता घटनामा संलग्न व्यक्तिलाई नियन्त्रणमा लिइ कारबाही गर्न सरकारसमक्ष माग गरेका छन् ।
पार्टी सभापति एवं प्रधानमन्त्री तथा डडेल्धुरा जिल्ला प्रतिनिधिसभाका उम्मेदवार बस्नुभएको होटल नजिक कैलालीको धनगढीमा बम फेला परेको उल्लेख गरिएको छ ।
