धनुषा । चाची आहा सब भोट गिराब त जायछिय नै’, जनकपुर उपमहानगरपालिका–२१ कुर्थाटोलको चौरमा स्वयंसेविका जानकीकुमारी नायक आइतबार मतदातालाई शिक्षा दिइरहेकी थिइन्।
स्थानीय वृद्धा ध्यानपूर्वक मतदान गर्ने तरिका सिकिरहेकी थिइन्। दुई स्वयंसेविकाले मतदातालाई तीनवटा मतपत्रमा चार ठाउँमा छाप लगाउनेबारे बताए। रातो रंगको मतपत्र रातै बाकसमा, हरियो रंगको हरियोमै र कालो रङको कालै बाकसमा खसाल्ने तरिका सिकाए। ती दुवै स्वयंसेविकालाई हामीले ती मतपत्रको भिन्नताबारे सोध्यौं। उनीहरूले नधकाई भने, ‘थाहा छैन।’
मंगलबारको कान्तिपुरमा लेखिएको छ, कात्तिक २५ गतेदेखि मतदाता शिक्षा कार्यक्रममा परिचालन गर्नुअघि जिल्ला निर्वाचन कार्यालयले एक दिन स्वयंसेवक तालिम दिएको थियो ।
‘निर्वाचनमा दुई दिन दिनुपर्ने, एक दिनमै सके। झोलासोला, पेपर, पैसा सबै बाँडेर समयय खेर गयो। १० देखि ५ बजेसम्म केही सिक्नै पाइएन’, राजर्षि जनक उच्च माविकी बालविकास शिक्षिका नायकले भनिन्, ‘५०–६० जनालाई तालिम दिएको थियो।
धेरै कुरा राम्ररी सुनिएन। मनमा लागेको कुरा सोध्न पाइएन।’ सिकेको कुरा सिकाउन पनि उनीहरूलाई सहज थिएन। पुरुष मतदाता महिलासँग सिक्न चाहिरहेका थिएनन्। ‘हामीलाई थाहा छ भन्दै पन्छिनुहुन्छ, महिलामात्र भेला हुन्छन्’ नायकले सुनाइन्, ‘कतिले त पार्टीबाट आएको जाऊ भन्दै गाली गर्छन्।
