पु.समाचार

डा. गोविन्द केसीले दिए गगन थापालाई शुभकामना

काठमाडौं । चिकित्सा शिक्षा क्षेत्रमा भएका वेथितिविरुद्धका अभियान्ता डा.गोविन्द केसीले प्रतिनिधि सभाका उम्मेदवार गगन थापा तीन करोड नेपालीको हितमा बोल्ने र नीति बनाउने नेता भएको भन्दै उनलाई जितको लागि शुभकामना दिएका छन्।

डा.केसीले आसन्न निर्वाचन सही नेता चुन्ने ऐतिहासिक अवसर भएको भन्दै तीन करोड नेपालीका हकहितमा बोलिदिने र नीति निर्माण गरिदिने व्यक्ति चुन्न आग्रह समेत गरेका छन्। ‘आइ वीस हिम बेष्ट अफ लक’ डा.केसीले एक भिडियो सन्देशमा भनेका छन्। संसद भनेको ऐन बनाउने र नीति बनाउने थलो भएको भन्दै गगन थापाजस्तो मान्छे निर्वाचित भएर आएमा देशलाई अझै अगाडि बढाउन सक्ने र नेतृत्व प्रधान गर्नसक्ने उनले बताएका छन्।

थापा काठमाडौँ ४ बाट प्रतिनिधि सभा सदस्यका लागि प्रतिस्पर्धामा छन्। आइतबारको नागरिकमा लेखिएको छ, डा.केसीले धेरैका शीर्षस्त भनिने नेताहरू नै तीन करोड नेपालीको स्वस्थ रहेर जिउने र सबै विद्यार्थीले सुलभ शिक्षा पाउन भन्ने उद्देश्यले भएको आफ्नो अभियानविरुद्ध लाग्दा थापा तेस्रो अनशनदेखि नै अभियान्ताकै रुपमा काम गरेको उल्लेख गरेका छन् ।

आफूले चिकित्सा शिक्षा ऐन बनाउन माग गर्दा सुरुमा कार्यदल बन्न नदिएको, पछि प्रतिवेदन सार्वजनिक हुनै नदिएको र संघर्षकै बलमा प्रतिवेदन अनुसार ऐनका मस्यौदा बनेको उनले बताएका छन्। ‘अहिले ऐनलाई आउन नदिइ भ्रुण हत्या गर्ने कोसिस भयो’ उनले भनेका छन्, ‘अहिलेसम्म भएको उपलब्धिमा उहाँ (गगन थापा) को सराहनीय भूमिका छ’ अध्यादेशसम्म ल्याउन थुप्रैले भूमिका निर्वाह गरे पनि सबैभन्दा बढी थापा नै सक्रिय भएको उनले जनाएका छन्। ‘गगन थापाको मुख्य भूमिका नभएको भए यो स्थिति आउने थिएन’ डा.केसीले भनेका छन्।

लोकमानले संविधानभन्दा माथि बसेर स्वेच्छाचारिता प्रदर्शन गरेर प्रजातन्त्र नै खतरामा परी ६०१ ले बोल्ने हिम्मत नगर्दा थापाले नै महाअभियोग प्रस्तावका लागि अगुवाई गरेको समेत उनले स्मरण गरेका छन्। सार्वजनिक महत्वको प्रस्तावका लागि तीन जना सासंद जुटाउन पनि थापाले नै पहल गरेको डा.केसीले बताएका छन्।

थापा राष्ट्रिय मुद्दामा भुमिका निर्वाह नचुक्ने नेताको रुपमा आफूले जानकारी पाएको भन्दै निर्वाचनमा जनताले आफ्ने पक्षमा बोल्ने सही नेता चुन्नुपर्ने दोहोर्याए। आफ्ना स्वार्थका लागि जे पनि गर्ने नेतालाई जनताले सजाय दिने बेला समेत यही भएको टिप्पणी उनले गरेका छन्। देश ठूला नेताको पैत्रिक सम्पत्ति नभएको र उनीहरूको कारण देशमा प्रजातन्त्र आएको यतिका वर्षसम्म संस्कारै विकास हुन नसकेको समेत उल्लेख गरेका छन्। ‘अहिले देशमा दण्डहीनता, माफियातन्त्र संस्थागत भएको छ’ डा।केसीले भने, ‘जुन नेताहरू आफ्ने स्वार्थ पूर्तिका लागि तीन करोड नेपालीको स्वस्थ रहेर जिउन पाउने अधिकार रक्षाको ऐन बन्न दिएनन् तिनिहरूलाई सजाय दिनुपर्छ।’