काठमाण्डौ । रक्षामन्त्री भीमसेनदास प्रधानले निर्वाचन बिथोल्न खोज्ने विप्लव नेतृत्वको नेकपाका दुई हजारजनालाई सरकारले पहिचान गरेर विशेष निगरानी गरिरहेको बताएका छन् । तीमध्ये पाँच सय पक्राउ परेको उनले बताए ।
प्रधानले निर्वाचन बिथोल्न सक्रिय व्यक्तिको भागाभाग भएको र त्रासले अर्धभूमिगत भएको भन्दै ढुक्कसँग मतदान गर्न आग्रह गरे । ‘अब कसैले चाहेर पनिनिर्वाचन बिथोल्न, केही गर्न सक्ने अवस्था छैन, करिब पाँच सयजनालाई गिरफ्तार गरिसकिएको छ, धेरैको भागाभाग भइरहेको छ,’ रक्षामन्त्री प्रधानले शनिबार काठमाडौंम आयोजित एक कार्यक्रममा भने ।
रक्षामन्त्रीले चुनावअघि देशका विभिन्न भागमा भएका हिंसात्मक घटनामा विप्लव नेतृत्वको नेकपाका कार्यकता संलग्न भएको जिकिर गरे । तर, बम र विद्युतीय धराप विस्फोटका घटनाबारे नेकपाले हालसम्म जिम्मेवारी लिएको छैन ।
‘निर्वाचनविरोधी गतिविधिमा विप्लव समूहले बम आतंक मच्चाएको छ, निर्वाचन बिथोल्न खोज्ने विप्लव समूहका नेताहरूलाई सुरक्षा संयन्त्रले अहिले व्यापक खोजिगरिरहेको छ,’ रक्षामन्त्री प्रधानले भने, ‘तर उनीहरूका सामान्य घटनाले निर्वाचनलाई असर गर्दैन । निर्वाचन निष्पक्ष, स्वतन्त्र र धाँधलीरहित हुन्छ, सुरक्षा व्यवस्था भइसकेको छ ।’
सरकारले नेकपासँग वार्ता नगर्ने पनि मन्त्री प्रधानको भनाइ थियो । ‘चुनावको मुखमा हामी उहाँहरूसँग वार्ता गर्दैनौँ, तर, हामी हिट एन्ड रनको पक्षमा छैनौँ, यदि विप्लव समूह वार्तामा आयो भने हामी कुरा सुन्न तयार छौँ,’ प्रधानले भने । तर, संविधान ल्याउन विप्लव नेतृत्वको पार्टीको पनि भूमिका भएको भन्दै प्रधानले प्रशंसासमेत गरे ।
यसैबिच, रक्षामन्त्री प्रधानले आइतबार हुने ३२ जिल्लाका प्रतिनिधिसभा र प्रदेश सभा निर्वाचनमा २८ हजार आठ सय ४६ सेना खटिएको बताए । ‘दुवै निर्वाचनका लागि ६४ हजार २० सेना खटिँदै छन्, नेपाल प्रहरीको कुल क्षमतामध्ये ९० प्रतिशत यो निर्वाचनमा खटिँदै छन्, त्यस्तै हवाई अनुगमन भइरहेको छ, सुरक्षाको सम्पूर्ण प्रबन्ध मिलाइएको छ’ रक्षामन्त्री प्रधानले भने ।
पहिलो चरणको निर्वाचनका लागि सरकारले भरपर्दो सुरक्षाव्यवस्था गरेको उनले बताए । ‘ढुक्क भएर मतदानमा सरिक हुनुहोस्, सरकारले भरपर्दो सुरक्षाको व्यवस्था गरेको छ, तपाईहरू निर्धक्क भएर मतदान गर्नुहोस्, आफ्नो अमूल्य मत दिनुहोस्, मत हाल्दा विवेक प्रयोग गर्नुहोस्,’ प्रधानले भने, ‘निर्वाचनलाई भयरहित वातावरणमा सम्पन्न गर्न सरकार अहिले २४ घन्टा खटिरहेको छ ।’
